Փաստ ինֆո

Ապրիլի 1-ի ընթացքում իրականացվել է 328 նմուշի հետազոտություն, որի արդյունքում 92 դրական թեստավորման արդյունք է ստացվել: Այս մասին հրավիրված ասուլիսին ասաց Առողջապահության նախարար Արսեն Թորոսյանը:

Նրա խոսքով՝ 92 անձանցից կեսից ավելին ի սկզբանե հայտնի անձինք են, ովքեր եղել են կամ մեկուսարանում, կամ ինքնամեկսուցման վայրում, կամ շփվել են նախկինում հաստատված դեպքերի հետ:

«Իհարկե կան նաև նոր օջախներ, հատկապես՝ բերովի»,- ասաց Թորոսյանը՝ նշելով, որ այդ դեպքերը բավականին վաղ են հայտնաբերվել և շփումների շրջանակն այնքան էլ լայն չէ:

Նախարարը նշեց, որ պետք չէ խուճապի մատնվել, սակայն խորհորդ տրվող գործողությունները՝ տեղաշարժման սահմանափակումները և հիգիենայի կանոններին հետևելը պետք է կրկնապատկվի այնքան, որ կարողանանք կոտրել տարածումը, քանի որ այլ տարբերակ, քան հայտնաբերել և տարածման ուղիները կոտրել՝ պարզապես չկա: Թորոսյանը կոչ արեց՝ վերաբերվել լուրջ:

Անդրադառնալով՝ երեկ գրանցված մահվան դեպքին,Թորոսյանն ասաց, որ նրա կյանքը փրկել հնարավոր չէր թե տարիքի, թե խրոնիկ հիվանդությունների պատճառով և հենց նրանց պաշտպանելու համար պետք է կոտրել տարածման շրջանակները: Թորոսյանը նաև հայտնեց, որ ունենք նաև երկու առողջացման դեպք և նրանք երեկ դուրս են գրվել: Թորոսյանը հույս հայտնեց, որ առողջացած քաղաքացիների թիվը կշատանա, քանի որ մոտենում ենք 14-օրվա ժամկետին:

«Ուզում եմ տեղեկացնել,որ պայքարի շրջանակներոմ 16 հյուրանոցային համալիրներում և հանգստյան տներում կան պահվող քաղաքացիներ, որոնց մի մասը դրական, բայց թեթև ընթացք ունեցող հիվանդներ են, իսկ մյուս մասը կոնտակտավորներ են »,- ասաց Թորոսյանը:

Նրա խոսքով՝ 9 բժշկական կենտրոններ ամբողջությամբ ներգրավված են հիվանդության դեմ պայքարի գործում, որոնցից Սուրբ Գրիգոր Լուսավորիչ ԲԿ-ն կվերցնի հիմնական բեռն իր վրա: Թորոսյանը նշեց, որ խոսքը վերաբերում է ստացիոնար մասնաշենքին:

Աղբյուր` Փաստինֆո