Փաստ ինֆո

Նախորդ շաբաթ Երևանի ընդհանուր իրավասության դատարանը դատավոր Արման Հովհաննիսյանի նախագահությամբ կալանավորին կալանքից ազատ է արձակել հենց կորոնավիրուսի հետ կապված: «Փաստինֆո»-ի հետ զրույցում այս մասին ասաց միջազգային իրավունքի փորձագետ Արա Ղազարյանը պատասխանելով հարցին, արդյոք կարիք չկա վերանայել մինչդատական վարույթի ընթացքում ոչ ծանր հանցագործությունների համար կալանքի տակ գտնվող անձանց խափանման միջոցը:

«Դատավոր Արման Հովհաննիսյանն անցած շաբաթ կալանավորին ազատ է արձակել հենց կորոնավիրուսով ստեղծված իրավիճակով պայմանավորված: Գործի մանրամասներին չեմ տիրապետում, բայց բավականին հետաքրքիր որոշում էր: Այսինքն` առաջին դատական ակտն արդեն կայացվել է: Կարևորը դատական ակտը կա, մնում է դա դարձնել քաղաքականություն»,-ասաց Արա Ղազարյանը:

Վերջինս ընդգծեց, որ հիմա կա նաև Խոշտանգումների կանխարգելման կոմիտեի կորոնավիրուսի պայմաններում կալանավորման վերաբերյալ նորմերը, որը մարդու իրավունքների պաշտպանը նույնպես հրապարակել է: Մասնագետը նկատեց դրանք ուղեցույց են, բայց, իհարկե, միայն այս հիմքով չպետք է ազատ արձակել: Պետք է հաշվի առնել նաև այլ պայմաններ, այդ թվում կալանքի հիմքերը, որպեսզի անձը փախուստի չդիմի. «Ուղղակի եթե կալանավայրը հնարավորություն չունի նման հիվանդներին խնամելու, ուրեմն պետք է ազատ արձակի: Դա արդեն ընդհանուր նորմ է: Կարծում եմ նման դատական ակտեր էլի կլինեն»,-ասաց Արա Ղազարյանը:

Ավելի վաղ հայտնել էինք, որ «Վարդաշեն» ՔԿՀ-ի Պահպանության բաժնի 5 աշխատակցի մոտ հայտնաբերվել է կորոնավիրուս: Նրանք բոլորը մեկուսացվել են բուժհաստատություններում. «Աշխատակիցներն իրենց ծառայությունն իրականացնում են քրեակատարողական հիմնարկի բնակելի գոտու սահմաններից դուրս և կալանավորված անձանց ու դատապարտյալների հետ որևէ շփում չունեն»,-նշված էր Արդարադատության նախարարության տարածած հաղորդագրության մեջ:

Հեղինակ՝ Հասմիկ Կոշկարյան

Աղբյուր` Փաստինֆո