Փաստ ինֆո

«Ագրարագյուղացիական միավորում» ՀԿ նախագահ Հրաչ Բերբերյանը գտնում է, որ Կառավարության կողմից գյուղացիներին տրամադրվող աջակցությունն ուշացած է։

«Կառավարության կողմից գյուղացուն ֆինանսական ռեսուրսներով օգնելու որոշումներն արդեն ուշացած են, այս օգնությունը պետք է հունվար ամսին լիներ, որպեսզի գյուղացին կարողանար թունաքիմիկատներ ձեռք բերել ու պահանջին համապատասխան պարարտանյութ ձեռք բերեր,իսկ այսօր գյուղացին ոչինչ չի արել»,-«Փաստինֆո»-ի հետ զրույցում ասաց Բերբերյանը։

Նա նշեց, որ եթե ապրիլին կառավարությունը հասցնի վարկավորումներ տրամադրել գյուղացուն, արդեն ուշ է լինելու, հատկապես Արարատյան դաշտավայրի համար։

Բերբերյանն արձանագրեց նաև, որ գյուղացիները հաճախ ցանկանում են գալ մայրաքաղաք՝ թունաքիմիկատ գնելու նպատակով, սակայն տեղաշարժման թերթիկի հետ կապված խնդիրներ են ունենում։

Անդրադառնալով պարենային խնդրին՝ նա շեշտեց, որ միանշանակ թանկացումներ կան, սակայն կառավարության աշխատակիցները, չգիտես ինչու, ժխտում են այդ փաստը։

«Պնդում են, թե թանկացումներ չեն եղել, միանշանակ թանկացումներ կան թունաքիմիկատների, սննդամթերքի հետ կապված, նույնիսկ սպիրտի գինը մի քանի անգամ բարձրացել է։ Կու՞յր են կառավարությունում նստածները, բա չե՞ն տեսնում, որ սպառողական ապրանքներն են թանկացել, կաթնամթերքն է թանկացել։

Եթե գյուղացին չկարողանա անասնապահությամբ զբաղվել, կաթնամթերքը կթանկանա, հատկապես որ գլխաքանակի անկում ունենք, բայց այնտեղ կլոր գլուխներով հաստագլուխներ կան, որ դա չեն ուզում ընդունել»,-ասաց Բերբերյանը։

Նա ընդգծեց՝ Կառավարությունը եթե իրոք ուզում է ունենալ առաջավոր գյուղատնտեսություն, ապա պետք է ֆինանսական լծակներ ներդներ ու այդ ֆինանսները ճիշտ օգտագործեր։

«Թե չէ այսօր ԿԲ նախագահն առաջարկում էր մի ծրագիր ու ասում, որ այն շատ լավն է, այգիներ են տնկվելու։ Բայց նա թող գնա իր գործով զբաղվի ու մասնագետները որոշեն ապագա կունենա այդ այգին թե ոչ։ Մի մարդ, որ կարանտին բառը լսել է առաջին անգամ այսօր զբաղվում է արտակարգ իրավիճակներով։ Կարանտինը մասնագիտական բառ է, պետք է մասնագետ լինել, որ հասկանաս ինչ անես։ Հաջողություններն ու անհաջողությունները կախված են մեր գիտելիքներից, որոնք, ցավոք սրտի քիչ են, կամ ընդհանարպես չկան»,-ամփոփելով խոսքն ասաց «Ագրարագյուղացիական միավորում» ՀԿ նախագահը։

Հեղինակ՝ Սոնա Գեւորգյան

Աղբյուր` Փաստինֆո