Փաստ ինֆո

ԱԱԾ նախկին տնօրեն Արթուր Վանեցյանի ներկայացուցիչների ներկայացրած՝ հայցի ապահովման կիրառման միջնորդությունը մերժելու մասին Երևանի ընդհանուր իրավասության դատարանի որոշման դեմ վերաքննիչ բողոքը կքննվի գրավոր ընթացակարգով: 

Ինչպես արդեն տեղեկացրել ենք՝ ԱԱԾ նախկին տնօրեն Արթուր Վանեցյանի ներկայացուցիչները հայցադիմում են ներկայացրել «Հայկական Ժամանակ» օրաթերթի դեմ պահանջելով հերքել «Պատիվ ունե՞մ, թե՞ պատիվ չունեմ...» վերտառությամբ հոդվածում տեղ գտած զրպարտություն հանդիսացող տվյալները, հոդվածը հեռացնել և պարտավորեցնել հրապարակել հերքման տեքստը, փոխհատուցել պատճառված ոչ գույքային վնասը:

Երևան քաղաքի ընդհանուր իրավասության առաջին ատյանի դատարանը՝ դատավոր Ա. Փիլոսյանի նախագահությամբ, վարույթ ընդունել է Ա.Վանեցյանի հայցադիմումը, բայց մերժել հայցի ապահովման միջոց կիրառելու միջնորդությունը։ «Փաստինֆո»-ն ավելի վաղ տեղեկացրել է, որ հայցվորը գույքային պահանջ չի ներկայացրել թերթի դեմ, այլ միայն պահանջել է արգելել «Հայկական ժամանակ» օրաթերթին՝ որոշակի գործողություններ կատարել։

Միջնորդությունը մերժելու որոշման դեմ փաստաբանների ներկայացրած վերաքննիչը բողոքը մակագրվել է քաղաքացիական վերաքննիչ դատարանի դատավոր Հարություն Ենոքյանին, որը մարտի 26-ին որոշում է կայացրել այն վարույթ ընդունելու ու գրավոր ընթացակարգով քննելու մասին։

«Վերաքննիչ դատարանը գտնում է, որ վերաքննիչ բողոքը համապատասխանում է ՀՀ քաղաքացիական դատավարության օրենսգրքի 368-րդ հոդվածի պահանջներին։ Նկատի ունենալով, որ գործին մասնակցող անձինք չեն միջնորդել վերաքննիչ բողոքը դատական նիստում քննելու վերաբերյալ, ինչպես նաև

Վերաքննիչ դատարանը չի հանգել վերաքննիչ բողոքը դատական նիստում քննելու անհրաժեշտության մասին եզրակացության, Վերաքննիչ դատարանը գտնում է, որ բողոքը պետք է քննվի ՀՀ քաղաքացիական դատավարության օրենսգրքի 374-րդ հոդվածով նախատեսված բողոքի քննության ընդհանուր կարգին համապատասխան, այն է՝ գրավոր ընթացակարգով»,- նշված է մարտի 26-ի որոշման մեջ։

Դատական ակտը կհրապարակվի ապրիլի 9-ին։

Աղբյուր` Փաստինֆո