Փաստ ինֆո

Նախագիծը որևէ կերպ գաղտնալսման կամ տեղեկությունների բացահայտման մասին չէ: Այս մասին այսօր լրագրողների հետ հանդիպման ժամանակ ասաց ՀՀ արդարադատության նախարար Ռուստամ Բադասյանը անդրադառնալով կորոնավիրուսով վարակվածների կոնտակտավորներին տեղորոշելու վերաբերյալ ընդունված օրենսդրական փաթեթին:

Նախարարը նկատեց այդ կարգավորումները տեխնիկապես էլ հնարավորություն չեն տալիս քաղաքացիների զանգերը գաղտնալսել կամ բովանդակությանն այլ կերպ ծանոթանալ. «Այս կարգավորումները կիրառվելու են բացառապես արտակարգ դրության ընթացքում և դրանից հետո չեն գործելու: Սա վերաբերում է միայն այն արտակարգ դրությանը, որը հայտարարվել է համաճարակի հիմքով: Բոլոր տվյալները կլինեն դրանք անձնավորված, թե ապաանձնավորված կոչնչացվեն արտակարգ դրության ավարտից անմիջապես հետո»,-ասաց Ռուստամ Բադասյանը:

Վերջինս նշեց, որ զանգելու փաստը և միևնույն տեղանքում հայտնվելն այն տվյալներն են, որոնք ավտոմատ համակարգն անմիջապես համադրում է:

Նախարարը մանրամասնեց, եթե զանգի հասցեատերերի հետ նրանք մի տեղակայման վայրում պարբերաբար հայտնվել են, նշանակում է կա ռիսկի գործոն:

Դրա հիման վրա ավտոմատ համակարգը բերում է այդ տեղեկությունները. «Անմիջապես ավտոմատացված տվյալների հիման վրա կբերվեն տեղեկություններ, և այդ պոտենցիալ վարակվածներն ավելի վաղ, միանգամից կտեղեկացվեն, որ հնարավոր է իրենք վարակվել են և կիրականացվեն մեկուսացման ու ինքնամեկուսացման սահմանափակումները: Այսինքն՝ իրենք իրենց հարազատների հետ չեն շարունակի շփումները, և այդ շղթան հնարավոր կլինի կոտրել:

Այսինքն այն դինամիկան, որը բերելու է յոթ օրը մեկ կրկնակիի է հասցնելու, այս միջոցով հնարավոր է կանխարգելել դա»,-ասաց Ռուստամ Բադասյանը ընդգծելով, որ սա համաչափ է, որովհետև մի դեպքում հանրային և առողջության պահպանման տեսանկյունից, մյուս դեպքում համաչափ և շատ սահմանափակ անձնական տվյալների հավաքագրում է` համաճարակի դեմ պայքարելու համար:

Աղբյուր` Փաստինֆո