Փաստ ինֆո

Իշխանությունների վարքաբանությունը վերջին 10 օրվա ընթացքում վկայում է, որ կորոնավիրուսի դեմ պայքարի համատեքստում վերջիններս հետզհետե իրենց մարման գնացող հեղինակության վերագտնելու խնդիր են լուծում, զուգահեռաբար, նաև՝ այլ տարբերակներ նկատի ունենալով՝ եթե-ապա տրամաբանության մեջ:

Պոպուլիզմի դասական դրսևորում է « տնային կալանքի» և սոցիալական բարդագույն վիճակում գտնվող մեր համաքաղաքացիներին կատարած վարչապետ Փաշինյանի հեռախոսազանգերը: Բարև ձեզ, Նիկոլն է՝ այս կերպ ներկայանալով, նա կամենում է վստահեցնել մարդկանց, թե ինքը չի փոխվել, ինքը նրանցից յուրաքանչյուրի և բոլորի Նիկոլն է: Ավաղ, թե հեռախոսից այն կողմ պատասխանող, թե հետո՝ սոցցանցերում մեկնաբանություններ անող քաղաքացիների տեքստերը բնավ չեն վկայում, որ նրանք առաջվա պես վստահում են իրենց երբեմնի Նիկոլին:

Իրականում, այդպես էլ պիտի լիներ, իսկ կորոնավիրուսն ուղղակի արագացրեց հիասթափությունը: Մարդիկ տեսնու՞մ են, չէ՞, վիրուսի ահագնացող դինամիկան, հետո այն բնականաբար, համադրում են առաջին վարակակրի հայտնաբերումից մինչև արտակարգ դրության հայտարարման միջև ընկած օրերի հետ, ապա՝ նաև՝ «Այո»,-ի քարոզարշավի՝ մարզերում ընթացող մոլեռանդ քարոզչության ընթացքում Փաշինյանի և նրա թիմակիցների իմիջիայլոց և անպատասխանատու վարքագծի հետ ու եզրակացություններ անում: Չէ՞ որ զուգահեռաբար այդ օրերին աշխարհի մի շարք երկրներում համաճարակի պիկն էր, որը շուտով չոքելու էր մեր դռանը:

Ինչևէ, այսօր մենք ենք հաղթահարում և իրավիճակից ելքեր փորձում որոնել: Իրավիճակի հաղթահարման, վիրուսի նահանջի հետ կապված՝ մեր իշխանությունների առաջարկած որևէ լուծում, ելք մինչ այս շաբաթվա ԱԺ նիստերը հայտնի չէին, իսկ ՀՀ քաղաքացիների անձնական տվյալներին հասանելիություն ստանալու նախագիծը, որն առաջարկվեց երեկ, նախորդ օրը արդարադատության նախարարի կողմից և որը կյանքի գնով իմքայլական մեծամասնությունը ընդունեց՝ իրականում կորոնավիրուսի համաճարակը հաղթահարելու հետ բոլորովին կապ չունի:

Եվ գիտեք, ո՞րն էր հետաքրքիրը, այդ նախագծի ընդունումը որքան էլ իշխանական մեծամասնության կողմից հերոսական քայլ որպես փորձ արվեց ներկայացնել՝ այն համատեքստում, որ տեսեք, մենք քաղաքացու անհատական տվյալների՝ հեռախոսային խոսակցությունների, հաղորդագրությունների, տեղորոշման հասանելիության նախագծով թեպետ մարդու իրավունքների և հիմնարար ազատությունների դեմ ենք գնում, բայց մենք դա անում ենք ի շահ կորոնավիրուսի ճիրաններում հայտնված մեր հայրենակիցների, ի շահ վիրուսի դեմ պայքարող բուժանձնակազմի: Մեկը հարցնող լինի, իսկ երբ Հայաստանում արդեն հաստատված վարակակիր կար և ԱՀԿ-ն էլ արդեն պանդեմիա էր հայտարարել, ինչու՞ էիք հանրաքվեի անհետաձգելիության սինդրոմով մարզից մարզ վարակի հնարավոր տարածման նախադեպեր ստեղծում, ինչ է, թե՝ ՍԴ 7 դատավորներ ձեր սրտով չեն:

Հիմա, էլ, համաճարակային իրավիճակից եք ցանկանում դիվիդենտներ շահել, ձեռքի հետ էլ՝ ընդդիմությանը մեղադրում, թե՝ էս ինչ անսիրտ-անհոգի եք, մարդու իրավունքներն ու ազատությունները չզոհաբերեցիք մարդկային կյանքերին ու առողջությանը:

Իրականում, տոտալ վերահսկողությանը զուգահետ արտակարգ իրավիճակի ռեժիմում խստացումներ մտցնելով, աշխատող մարդկանց, այդ թվում նաև բուժաշխատողների համար արհեստական դժվարություններ եք ստեղծում՝ չկարողանալով արդյունավետ որևէ լուծում առաջարկել հանրային տրանսպորտի շահագործման առումով: Արդյունքում, մարդիկ քաղաքի մի ծայրից մյուսը ոտքով են հաղթահարում, չէ՞ որ նրանց տաքսու փող չեք տվել, որ հարկադրում եք տաքսիներով երթևեկել: Գոյատևման, ապրուստի խնդիր ունեցող մարդու մատից ոչ մի փուշ չհանած՝ դուք նրանց շարունակ տանում եք փորձությունների ճանապարհով: Ձեր սուտ հեղափոխությամբ, սև-սպիտակով, արգելքներով ու պատիժներով, առճակատումներով, հիմա էլ՝ տոտալ վերահսկողությամբ: Շունչդ պահիր, ազատությունդ, իրավունքներդ զորաբերի… հանուն ինչի՞…

Իրականում՝ կորոնավիրուսը Փաշինյանի համար պոպուլիզմի նոր ասպարեզներ բացելով՝ միաժամանակ էլ՝ նրա հեղինակության վախճանն է մոտեցնում:

Հեղինակ Մարինե Մինասյան

Աղբյուր` Փաստինֆո