Փաստ ինֆո

Երևանի ընդհանուր իրավասության դատարանը բավարարել է ոստիկանի նկատմամբ բռնություն գործադրելու մեջ մեղադրվող Հարություն Ղազիկյանին գրավի դիմաց ազատ արձակելու մասին փաստաբանի միջնորդությունը՝ գրավի չափ սահմանելով 5 մլն ՀՀ դրամը: Այս մասին «Փաստինֆո»-ի հետ զրույցում ասաց փաստաբան Էրիկ Ալեքսանյանը:

Նշենք, որ դեպքը տեղի է ունեցել օրեր առաջ` մարտի 26-ին ՝ Բագրատունյաց փողոցում: Ոստիկանը մոտեցել է քաղաքացուն և պահանջել տեղաշարժի վերաբերյալ թերթիկը և անձը հաստատող փաստաթղթերը: Ոստիկանը նրա մոտ, իբր, նկատել է ատրճանակ և սառը զենք՝ դանակի տեսքով և պահանջել նաև դրանց վերաբերյալ փաստաթղթերը: Ըստ նախաքննական մարմնի` քաղաքացին մոտեցել է ավտոմեքենային եւ, իբր, փորձել փախուստի դիմել, ոստիկանը ձեռքը գցելով ղեկին՝ կախվել է ավտոմեքենայից, ինչի պատճառով մեքենան քարշ է տվել ոստիկանին՝ պատճառելով մարմնական վնասվածքներ:

Փաստաբանը վստահեցնում է, որ տղամարդն ունեցել է իր տեղաշարժման հետ կապված համապատասխան բոլոր փաստաղթղթերը, ու չի ունեցել ոչ մի զենք:

«Չի եղել ոստիկանի կողմից մի այնպիսի օրինաչափ պահանջ, որը պատրաստ չենք եղել կատարելու, հերքել ենք զենքի և սառը զենքի առկայությունը»,- նշեց Ալեքսանյանը:
Ինչ վերաբերում է առաջադրված մեղադրանքին, ապա փաստաբան Էրիկ Ալեքսանյանը նշեց, որ իր պաշտպանյալն իրեն առաջադրված մեղադրանքը չի ընդունում, ավելին՝ մեղադրանք է առաջադրվել ՝ իշխանության ներկայացուցչի նկատմամբ կյանքի ու առողջության համար վտանգավոր բռնություն գործադրելու համար՝ առանց վնասվածքների մասին փորձագետի եզրակացության:

«Տվյալ դեպքում մենք անգամ չունենք փորձագետի եզրակացություն, բայց մեղադրանք է առաջադրվել 316-րդ հոդվածի 2-րդ մասով, այսինքն՝ նշել են, որ միջին ծանրության մամնական վնաս է հասցվել»,- ասաց Ալեքսանյանը:

Նրա փոխանցմամբ` պաշտպանական կողմը վիճարկել է, թե կալանավորման պայման` հիմնավոր կասկածը, թե հիմքերը: Անդրադառնալով՝ կալանավորման հիմքերի առկայությանը, փաստաբանը նշեց, որ փաստացի թաքնվելու մասին խոսք չէր կարող լինել, քանի որ ներկայացել են ինքնակամ և մասնակցել բոլոր քննչական գործողություններին: Ինչ վերաբերում է գործի քննությանը խոչընդոտելու ռիսկին, ապա փաստաբանն ասաց, որ առերեսում է եղել տուժողի հետ: Բացի այդ՝ թե՛ տուժողը, թե՛ վկաները ոստիկանության ծառայողներ են, ինչը նշանակում է, որ ոստիկանության աշխատակիցների վրա ապօրինի ազդեցություն գործադրելն իրատեսական չէ, հետևաբար՝ այդ հիմքը գոյություն ունենալ չի կարող:

«Նոր հանցանք կատարելու հիմքի մասով էլ քննիչը փաստական տվյալ չի ներկայացրել և առաջնորդվում են բացառապես առաջադրված մեղադրանքի ծանրությունը մատնանշելով, մինչդեռ՝ դա կալանավորման հիմք չէ, այլ՝ ընդամենը տարր է և կարող է հաշվի առնվել միայն հիմքերի համատեքստում»,- ասաց Ալեքսայանը:
Նշենք, որ Ղազիկյանը դեռևս գտնվում է ՔԿՀ-ում, քանի որ գրավը դեռ չի վճարվել:

Հեղինակ՝ Իզաբել Սահակյան

Աղբյուր` Փաստինֆո