Փաստ ինֆո

«Իրազեկ քաղաքացիների միավորում» ՀԿ-ն Արցախում մարտի 31-ին տեղի ունեցած ընտրությունների շրջանակներում դիտարկել է ԱՀ-ում 49 տեղամասեր և Երևանում գտնվող 1 ընտրատեղամաս։

ՀԿ-ի ծրագրերի համակարգող Դանիել Իոաննիսյանն այսօր հրավիրված ասուլիսում հայտնել է, որ 9 ընտրատեղամասում արձանագրվել են դեպքեր, երբ ընտրողները քվեարկությունից հետո բարձրաձայնել են իրենց ընտրության մասին, քվեախցիկից դուրս քվեարկելու դեպքեր են եղել դիտարկված տեղամասերից 40-ում, այսինքն` 80 տոկոսում, և հաշվարկվել է 700 նման դեպք, որոնք հիմնականում եղել են տարեցների կողմից։

«2 տեղամասում գրանցվել է քվեաթերթիկը դուրս տանելու փորձ, մեկում ընտրողը փորձել է քվեաթերթիկը դուրս տանել այն բանից հետո, երբ հանձնաժողովի նախագահն արգելել է լուսանկարել քվեաթերթիկը։ Դիտարկված 49 տեղամասերից շուրջ 20%-ում դիտորդներն արձանագրել են ընտրողի կողմից սեփական քվեաթերթիկը լուսանկարելու դեպքեր»,-ասաց Իոաննիսյանը։

Նա ընդգծեց, որ թվարկվածներից ոչ մի դեպքում հանձնաժողովների նախագահները չեն դիմել տեղամասում ծառայություն իրականացնող ոստիկաններին, մի քանիսը դա պատճառաբանել են համապատասխան հրահանգավորմամբ՝ նշելով, թե իրենց հրահանգել են նման դեպքում ոստիկանությանը չդիմել։

«Դիտարկված տեղամասերից 7-ում վստահված անձը փորձել է այլ անձանց հրահանգներ ու կարգադրություններ տալ, մեկ դեպքում նման լիազորություն իրեն վերապահել է ԶԼՄ ներկայացուցիչը, և դա հիմնականում նրա արդյունքն է եղել, որ որոշ տեղամասերում հանձնաժողովի նախագահը կամ անդամները չէին տիրապետում իրենց գործառույթներին»,-ասաց ՀԿ-ի ծրագրերի համակարգողը։
Իոաննիսյանը հայտնեց նաև, որ 10 տեղամասերում գրանցվել են վիճաբանության դեպքեր՝ հիմնականում վստահված անձանց ու հանձնաժողովների անդամների մասնակցությամբ են։

«Ընտրողների կազմակերպված տեղափոխում նկատվել է 3 տեղամասի շրջակայքում, 2 դեպքում տեղափոխումը թեկուզ կազմակերպած էր, բայց չէր կրում համակարգային բնույթ։ Քարվաճառում տեղափոխումն անընդհատ էր ու կազմակերպված էր Արայիկ Հարությունյանի աջակիցների կողմից»,-ընդգծեց Իոաննիսյանը։

Նրա խոսքով, 2 ընտրական տեղամասերում հաշվարկի ժամանակ ինչ-ինչ անճշտություններ շտկելու համար իրականությանը չհամապատասխանող թվեր են գրանցվել գրանցամատյանում կամ փոխվել են ելակետային տվյալները։

«Մեր գործընկեր՝ «Ականատես» կազմակերպությունների դաշինքը երկարաժամկետ դիտորդություն է իրականացրել և մտահոգություններ է բարձրացրել՝ կապված վարչական ռեսուրսի օգտագործման և քարոզչությանը զուգորդվող բարեգործության հետ։ Քարոզչության հետ զուգորդվող կամ թեկնածուների հետ փոխկապակցված բարեգործության մասին ահազանգեր նույնպես եղել են և մեզ այդ մասին հայտնել են մեր բազմաթիվ զրուցակիցներ։ Այս հանգամանքները հիմք են տալիս մտածելու,որ ընտրողների կամքի վրա եղել են Ընտրական օրենսգրքով արգելված ներգործություններ»,-շեշտեց Իոաննիսյանը։

Աղբյուր` Փաստինֆո