Փաստ ինֆո

Կորոնավիրուսի տնտեսական հետևանքների չեզոքացման երկրորդ և երրորդ շահառուներն արդեն կարող են զանգահարել  81 05 և 041 010523 հեռախոսահամարներով ստանալու իրենց համար անհրաժեշտ տեղեկատվություն: Այս մասին այսօր մամուլի ասուլիսի ժամանակ ասաց ՀՀ էկոնոմիկայի նախարարության մամուլի խոսնակ Աննա Օհանյանը:

Էկոնոմիկայի փոխնախարար Նաիրա Մարգարյանը ներկայացրեց կորոնավիրուսի տնտեսական հետևանքների չեզոքացման երրորդ միջոցառման պայմանները: Նշենք, որ այս աջակցությունը միտված է փոքր և միջին ձեռնարկություններին աջակցությանը: Փոխնախարարի խոսքով կարող են մասնակցել այն կազմակերպությունները, որոնք գործում են զբոսաշրջության, առողջապահության, հանրային սննդի, մշակող արդյունաբերության ոլորտներում, որոնց 2019 թվականի շրջանառությունը եղել է 24-ից 500 մլն դրամի շրջանում և որոնց 2019 թվականի մեկ եռամսյակի շրջանառությունն ամբողջ տարվա շրջանառության 10 տոկոսից ավել է և որոնք ունեն բարվոք հարկային և վարկային պատմություն. «Այս կազմակերպությունները կարող են դիմել ստանալու անտոկոս վարկեր: Դրանք 36 ամսով տրամադրվող վարկեր են, որոնց առաջին երկու տարիների համար վարկը գործում է անտոկոս պայմաններով, վերջին տարվա համար վարկը գործում է 12 տոկոս պայմանով: Վարկը տրամադրվում է միայն անկանխիկ միջոցով և կարող է ծախսվել աշխատավարձի, հարկերի, վարձակալության, հումքի, կոմունալ վճարների ուղղությամբ: Վարկերը սահմանում են 6 ամիս արտոնյալ ժամկետ, այսինքն` այդ ամիսների ընթացքում շահառուն որևիցե մարում չի անում: Վեց ամիսներից հետո սահմանված մարման գրաֆիկով գործում են հետևյալ պայմանները. Բոլոր թվարկված ոլորտների համար յոթերորդ ամսից հավասարաչափ մարումներ են նախատեսված մինչև վարկի պայմանագրի ավարտը: Զբոսաշրջային ծառայությունների և կացության ոլորտների համար կա լրացուցիչ պայման, եթե շահառուն այդ երկու ոլորտից է և իր վերցրած վարկը չի գերազանցում 10 միլիոնը, ապա 7-ից 12-րդ ամիսներին մարման գրաֆիկը սահմանվում է հավասարաչափ, բայց ոչ ավել, քան ամսեկան 70 հազար դրամը, որից հետո 13-րդ ամսից մինչև պայմանագրի ավարտը կրկին հավասարաչափ մարումներ են տեղի ունենում»,-ասաց Նաիրա Մարգարյանը:

Վերջինս նշեց, որ հնարավոր են նաև վաղաժամ մարումներ, որի դեպքում որևէ տուգանք նախատեսված չէ և դրանք խրախուսվում են:

Աննա Օհանյանն էլ հավելեց, որ թեժ գիծը գործելու է ներդրումների աջակցման կենտրոնի ներքո: Թեժ գիծն աշխատանքային օրերին գործելու է 09:00-ից 18:00-ը: Փոխնախարարն ասաց, որ յուրաքանչյուր հայտատու, ով համապատասխանում է երրորդ միջոցառման պահանջներին, կարող է մուտք գործել isc.am կայք և լրացնել առցանց դիմումը:

Աղբյուր` Փաստինֆո