Փաստ ինֆո

«Լուսավոր Հայաստան» խմբակցությունը դիմել է կառավարությանը՝ առաջարկելով, որ Հայաստանում վերջին մեկ տարվա ընթացքում ձևավորված պարգևավճարների ֆոնդը վերացնել և այդ գումարներն ուղղել կառավարության՝ սոցիալական փաթեթների կիրառմանը: Լրագրողների հետ զրույցում այս մասին ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը:

«Վերջին մեկ տարվա մեջ նախարարների աշխատավարձը կրկնապատիկ է, այսինքն` 700 հազար էր, դարձել է 1,5 մլն: Խորհրդարանում պատգամավորները 30 տոկոսի չափով պարգևավճար են ստացել: Այսինքն ղեկավար կազմի, քաղաքական պաշտոնների այդ ֆոնդերն ամբողջությամբ առաջարկել ենք ուղղել սոցիալական նպատակների իրականացմանը: Այն փաթեթները, որոնք իրականացվել են, դրանք ընդլայնելուն, որովհետև բազմաթիվ մարդիկ այդ փաթեթների չափանիշների տակ չեն ընկնում և չեն օգտվելու այդ չափանիշներից: Օրինակ նրանք, ովքեր գրանցված աշխատող չեն եղել, նրանք, ովքեր աշխատանքից չեն ազատվել այն ժամանակահատվածում, որը կառավարությունն է նախատեսել: Օրինակ կարող եմ բերել, որ տեքստիլ ֆաբրիկան իր աշխատողներին աշխատանքից չի ազատել, տուն է ուղարկել: Կառավարությունն ասում է ով դուրս է եկել, նրանց աջակցում ենք: Դուրս է գալիս այս մարդիկ չեն ազատել, պահել են այդ մարդկանց, բայց հիմա այդ աջակցությունը չեն կարողանալու ստանալ»,-ասաց Էդմոն Մարուքյանը հավելելով, որ երեկ գրավոր դիմել է կառավարության ղեկավարին, ինչպես նաև Կենտրոնական բանկի նախագահին, որ իրավիճակի դրամատիզմին համահունչ պետական բյուջետային ծախսեր են անհրաժեշտ:

Էդմոն Մարուքյանը գտնում է այն, ինչ արվում է, ընդհանրապես բավարար չէ տեղի ունեցող սոցիալ-տնտեսական իրավիճակը որոշակի առումով հարթելուն:

Աղբյուր` Փաստինֆո