Փաստ ինֆո

Մենք քաղաքական գործիչ ենք դարձել նաև մեր մասնագիտական գիտելիքներ օգտագործելու շնորհիվ, այնպես որ մի՛ դավաճանեք ձեր մասնագիտական գիտելիքներին։ Եթե արտակարգ դրությունից եք խոսում, թույլ տվեք հիշեցնել, որ ձեզնից շատ ավելի վաղ մենք էինք ասում, որ արտակարգ դրություն պետք է հայտարարել և մտցնել սահմանափակումներ, մինչդեռ դուք օղիով ու պինցետով էիք պայքարում կորոնավիրուսի դեմ։ Այս մասին այսօր ԱԺ արտահերթ նիստի ժամանակ ասաց «Լուսավոր Հայաստան» խմբակցության պատգամավոր Տարոն Սիմոնյանը։

Հիշեցնենք, խորհրդարանը քննարկում է «Արտակարգ դրության իրավական ռեժիմի մասին» օրենքում լրացումներ կատարելու մասին և «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի փաթեթն երկրորդ ընթերցմամբ ընդունելու հարցը։ Նախագծով առաջարկվում է հասանելիություն ստանալ մարդկանց անձնական տվյալներին՝ նրանց գտնվելու վայրի մասին, ում հետ են հեռախոսազրույց ունեցել և այլն։

Պատգամավորի տպավորությամբ, իշխող քաղաքական ուժի պատգամավորների առաքելությունը կառավարությանը պաշտպանելն է ընդդիմությունից։

«Արդյոք համաչափ է այն գործիքը, որը դուք որոշել եք գործի դնել։ Ո՛չ, քանի որ սահմանափակումները մարդու իրավունքների բնագավառում մեծ են և այդ մեծ սահմանփակումներով դուք չեք հասնում ցանկալի նպատակի։Տոկոսային հարաբերակցությամբ չեմ ցանկանում նշել, բայց ձեր սահմանափակումներն ավելի մեծ ծավալի են, իսկ ձեր նպատակին հասնելու հնարավոր տարբերակը շատ փոքր, նեղ անցք է։ Հետևաբար` այս ծավալի սահմանափակումներով, այս գործիքով չեք կարող հասնել այդ նպատակին»,-ասաց Սիմոնյանը։

Նա նշեց, որ նախագծում առկա գործիքներն անհրաժեշտ ու պիտանի չեն ո՛չ տեխնիկական, ո՛չ էլ մասնագիտական առումներով։
«Տեղորոշման անարդյունավետությունն այստեղ բավականին մեծ տոկոս է կազմում, և դուք ո՛չ իրավաբանական, ո՛չ տեխնոլոգիական առումով չկարողացաք ապացուցել, որ այս գործիքով կարողանալու եք հստակություն մտցնել անձի տեղակայման վայրի և նրա կապերի մասին»,-ասաց ԼՀԿ պատգամավորը։

Նա ընդգծեց, որ անգամ առկա միջոցներն արդյունավետ կերպով չեն կիրառվում, ինչ մնաց նոր սահմանափակումներն արդյունավետորեն կիրառվեն․ «եթե սահմանին ջերմություն ունեցող մարդկանց դեռևս չեք սահմանափակում, եթե անձը ջերմություն և հազ ունենալով դիմում է հիվանդանոց ու ասում են գնա տուն, մեկուսացիր, մենք քեզ չենք կարող ծառայություն մատուցել, եթե այս խնդիրները դեռ չեք լուծել, ինչու եք հավելյալ սահմանափակումներ մտցնում, որոնց նպատակը, ցավոք սրտի, չի լինելու այն, որ համաճարակն օր առաջ պետք է դադարի»։

Աղբյուր` Փաստինֆո