Փաստ ինֆո

Նախօրեին պետաիրավական նիստում, որը մինչ ուշ գիշեր շարունակվել է, քննարկվել է «Արտակարգ դրության իրավական ռեժիմի մասին» օրենքում լրացումներ կատարելու մասին և «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի փաթեթը եւ պատգամավորները փորձել են առաջարկություններով բարելավել այն ։ Այս մասին այսօր ԱԺ արտահերթ նիստի ժամանակ ասաց «Իմ քայլը» խմբակցության պատգամավոր, Պետական-իրավական հարցերի մշտական հանձնաժողովի անդամ Նազելի Բաղդասարյանը։

Նա հայտնեց, որ քննարկումների արդյունքում օրինագծից հանվել է հեռախոսազանգերի սկզբի և ավարտի ֆիքսումը․ «Երբ մենք ֆիքսում ենք սկիզբն ու ավարտը, այս կերպ ֆիքսում ենք խոսակցության տևողությունը և երբ դա պարբերական ռեժիմով է արվում, կարող է նաև արտացոլել բովանդակությունը՝ թե X անձն Y անձի հետ ինչու է երկար տևողությամբ խոսում, ուրեմն նրանք մտերիմ են»։

Բաղդասարյանի խոսքով, նախագծից հանվել են նաև բժշկական գաղտնի փոխանցման հետ կապված որոշ դրույթներ։ Սկզբնական տարբերակում որևէ սահմանափակում չկար, թե երրորդ անձը տեղեկանալով բժշկական գաղտնիքի մասին ինչ կարող է անել, իսկ այժմ սահանփակումներ են մտցվել։

«Փոփոխության արդյունքում նաև հստակեցվել է, թե բժշկական կազմակերպություններն ու տեղեկատվություն տնօրինողներն ինչ հերթականությամբ ու ինչ կարգով են տվյալներ տրամադրելու։ Մեր առաջարկն է նաև եղել, որ հեղինակը վերանայի միջնորդավորված զանգերից տեղեկություն ստանալու դրույթը, սակայն դա չի ընդունվել»,-հայտնեց հանձնաժողովի անդամը։

Նա ընդգծեց, որ նախագծով նախատեսվում է, որ տվյալների ոչնչացումը նախատեսվում է արտակարգ դրության վերացումից հետո, ոչ ուշ քան 1 ամիս, սակայն, ըստ հանձնաժողովի, մեկ ամիսը բավականին երկար ժամանակ է, սակայն հեղինակի կողմից ժամկետի կրճատման վերաբերյալ հանձնաժողովի առաջարկությունը չի ընդունվել։

«Չի ընդունվել նաև այն առաջարկությունը, թե ինչպես մարդը կարող է բողոքարկել այս ընթացակարգը։ ՀՀ Սահմանադրությունն ու օրենքները չեն սահմանափակում մարդու բողոքարկելու իրավունքները, սակայն օրինագծում ֆիքսված չէ այս դրույթը»,-ասաց Բաղդասարյանը։

Նա շեշտեց՝ տվյալները, որոնք անձնավորված են կամ ապանձնավորված են դրանք ոչնչացվելու են։

«Ես կրկին շեշտում եմ, որ օրինագիծն իսկապես խնդրահարույց է, ուզում եմ պրակտիկա ձևավորենք, որ մարդու իրավունքների սահմանափակումներին վերաբերող օրինագծերը նման ռեժիմում չքննարկենք»,-ասաց Բաղդասարյանն ու ավելացրեց, որ հանձնաժողովը փոփոխություններով հանդերձ փաթեթին դրական եզրակացություն է տվել։

Աղբյուր` Փաստինֆո