Փաստ ինֆո

ԱԺ «Իմ քայլը» խմբակցության ղեկավար Լիլիթ Մակունցն այսօր լրագրողների հետ ճեպազրույցում պարզաբանել է, թե ինչու իր ղեկավարած խմբակցության բոլոր պատգամավորները նիստերի դահլիճում չէին ու չէին մասնակցում նախագծերի քվեարկությանը։

Նա նշել է, որ ըստ ԱԺ կանոնակարգ օրենքի՝ եթե բոլոր խմբակցություններից նիստին ներկա գտնվող պատգամավորները քվեարկում են, այդ դեպքում նախագծի ընդունման համար անհրաժեշտ է 43 ձայն, իսկ եթե մյուս խմբակցությունները բոյկոտում են ու չեն քվեարկում , ապա անհրաժեշտ են պատգամավորների 67 ձայները։

«Գիտեք, որ այս փուլում ԱՀ-ում են գտնվում «Իմ քայլը» խմբակցությունից 10 պատգամավոր, մյուս մասն էլ առողջական խնդիրների պատճառով այսօր ԱԺ-ում չէ, իսկ ովքեր մարզերից են Երևան չեն եկել, որովհետև ռիսկային գոտում են ու նախապես այդ մասին տեղեկացրել են»,ասաց Մակունցը։

Նա հայտնեց, որ «Իմ քայլը» խմբակցությունն երեկ մինչև ուշ գիշեր հետամուտ է եղել ոլոր հնչեցված առաջարկները Կառավարության հետ քննարկելուն․ «Կառավարությունն առաջարկների մեծ փաթեթ է ընդունել ու զիջումների գնացել։ ԱԺ լիագումար նիստերի դահլիճում մեր գործընկերներն ասում էին, որ բուժաշխատողները օգնություն ցույց տալ չեն հասցնում, ոստիկանությունը չի հասցնում իրավիճակը վերահսկել, բայց չէ՞ որ այս գործիքը կառավարությանն ու պարետատանը տրամադրվում էր, որպեսզի կարողանայինք չպարալիզացնել բուժաշխատողների աշխատանքը»։

Հարցին, գուցե «Իմ քայլի» ներսում հակասությունն էր պատճառը, որ այսօր նախագիծը չընդունվեց, Մակունցը պատասխանեց․ «Մեր խմբակցության առանձին պատգամավորներ ունեին հարցեր և դրանք պետք է հնչեցվեին լիագումար նիստերի դահլիճում։ Մտահոգությունների հետ կապված նաև առաջարկներ են հնչել և կարծում եմ խմբակցության միասնական քվեարկությունն ամեն ինչ ասում է»։

Նա պատգամավորների մոտ հարցերի առաջացումը կապեց նրա հետ, որ արտահերթ նիստին ներկայացվել էր օրակարգ, որին նրանք խորապես չէին հասցրել ծանոթանալ։

«Երեկ ի լրումն խմբակցությունում քննարկումներին, քննարկում ենք ունեցել պարետ Տիգրան Ավինյանի հետ, ով հանգամանալից ներկայացրել է նախագծի անհրաժեշտությունը, հրատապությունն ու կանխատեսվող արդյունքներն ինչից են միտված լինելու»,-տեղեկացրեց Մակունցը։
Նրա խոսքով, ստեղծված իրավիճակում «Իմ քայլը» ակնկալում էր, որ ընդդիմության մի քանի անդամներ կողմ կքվեարկեն, ինչպես եղավ Արման Բաբաջանյանի դեպքում։

Հիշեցնենք, որ ԱԺ-ն այսօր չընդունեց «Արտակարգ դրության իրավական ռեժիմի մասին» օրենքում լրացումներ կատարելու մասին» և «Էլեկտրոնային հաղորդակցության մասին» օրենքում լրացում կատարելու մասին» օրենքների նախագծերի փաթեթը։
Մինչ քվեարկությունն ԱԺ «Լուսավոր Հայաստան» խմբակցության ղեկավար Էդմոն Մարուքյանը «Բարգավաճ Հայաստան» խմբակցության գործընկերներին առաջարկեց չմասնակցել քվեարկությանը, որպեսզի նախագիծը չընդունվի։

Ընդդիմադիր խմբակցությունները քվեարկությանը չմասնակցեցին, իսկ իշխանության 65 հողմ ձայները բավարար չէին նախագիծն ընդունելու համար։

Աղբյուր` Փաստինֆո