Փաստ ինֆո

ԱԺ «Իմ քայլը» խմբակցության պատգամավոր Հովհաննես Իգիթյանը չի կարծում թե հակասություն կա կորոնավիրուսի տարածումը կանխելու նպատակով հասարակությանը ինքնամեկուսանալու հորդորների եւ իշխող խմբակցության քայլերի միջեւ, որն այսօր մեկ օրվա մեջ երկու անգամ արտահերթ նիստ գումարեց ու նախատեսվում է երրորդը: Ավելին, խմբակցության ղեկավար Լիլիթ Մակունցը հայտարարեց, որ այսօր առավոտյան «Իմ քայլից» անհրաժեշտ թվով պատգամավորներ ներկա չէին ԱԺ նիստին, քանի որ նրանց մի մասը հիվանդ էր, իսկ մյուսը՝ խոցելի խմբում է, սակայն հիմա անհրաժեշտություն է առաջացել, որ նրանցից մի քանիսը ներկա գտնվեն նիստին։

Իգիթյանի խոսքով, որեւէ հիվանդ պատգամավոր նիստին չի մասնակցել: «Ինքը ասաց, որ այն պատգամավորները , ովքեր ռիսկային խմբում են, խոսքը տարիքային քրոնիկ խնդիրներ ունեցողների մասին է, որ նրանք չէին մասնակցել, հիմա մասնակցում են: Որեւէ հիվանդ՝ ջերմություն ունեցող կամ այլ պատճառով ներկա չգտնվող պատգամավորներից չավելացան»,-«Փաստինֆո»-ի հետ զրույցում ասաց պատգամավորը:

Անդրադառնալով դիտարկմանը, որ որոշ պատգամավորներ, այդ թվում նաեւ Հովհաննես Իգիթյանը , կորոնավիրուսի վարակի տարածման օրերին եղել են արտերկրում՝ գործուղումների, արդյո՞ք այս հանգամանքը խնդրահարույց չէ նիստին մասնակցելու տեսանկյունից, պատգամավորն ասաց, որ ԵԽԽՎ պատվիրակության անդամների համար նախատեսված այցելությունները չեղարկվել են:

«Ես եղել եմ արտերկրում մարտի 7-ին եւ 8-ին: Արտերկրում եղել եմ, երբ այդ երկիրը վտանգավոր երկրների ցուցակի մեջ չէր: Վերադառնալուց հետո, հաշվի առնելով իմ անձնական պատասխանատվությունը, իմ կոլեգաների, ժողովրդի անվտանգությունը, ես ինքս իմ կամքով 14 օր եղել եմ իզոլացված, որեւէ մեկի, այդ թվում ՝ ընտանիքի, հարազատների, բարեկամների հետ չեմ շփվել, աշխարհի հետ եղել եմ էլեկտրոնային կապի մեջ, բացի այդ, ես եղել եմ կապի մեջ իմ բժիշկների, նաեւ համաճարակաբանների հետ, ունեմ ֆոտոներ, որոնք ուղարկել եմ՝ ամեն օր, օրը 3 անգամ ջերմություն եմ չափել»,-մանրամասնեց Հովհաննես Իգիթյանը:

Պատգամավորն ասաց՝ ինքնամեկուսացումից հետո նաեւ համապատասխան թեստ է անցել. «Կորոնավիրուսի ամենաբարձր թեստով հաստատված է իմ առողջ լինելը»:

Ինչ վերաբերում է հարցին, որ այսօր պատգամավորների մի զգալի մասն առանց պաշտպանիչ դիմակների էր, Իգիթյանն ասաց՝ սովորաբար դիմակ է կրում:

Հավելենք, որ Ազգային ժողովն այսօր երկրորդ անգամ գումարված արտահերթ նիստով առաջին ընթերցմամբ ընդունեց «Արտակարգ դրության իրավական ռեժիմի մասին» օրենքում լրացումներ կատարելու մասին» և «Էլեկտրոնային հաղորդակցության մասին» օրենքում լրացում կատարելու մասին» օրենքների նախագծերի փաթեթը, որով իշխանությունը մտադիր է հեռախոսի միջոցով տեղորոշել կորոնավիրրուսով վարակվածներին: Նիստին խորհրդարանական ընդդիմությունը չմասնակցեց :

Ըստ Իգիթյանի, ընդդիմությունը եւ իշխող խմբակցության պատգամավորները արտահերթ նիստի մասին ինֆորմացվել են միաժամանակ: «Ես ստացել եմ տեղեկությունը 16-ն անց 35-ին, իրենք էլ են ստացել այդ ժամանակ, բայց նիստը սկսվեց 40 րոպե ուշ: Որոշեցին, որ այդ հնարքով կարելի է տապալել նիստը, որովհետեւ, եթե մասնակցեին եւ դեմ քվեարկեին, միեւնույնն է, նախագիծը կանցներ»,-ասաց իշխանական պատգամավորը՝ հավելելով, որ ընդդիմությունն այդ իրավունքն ունի:

Միեւնույն ժամանակ, ըստ Իգիթյանի, որպես իշխանական թիմ արտակարգ իրավիճակի պայմաններում բոյկոտի իրավունք չունի:

«Մենք այսօր նորից հավաքվեցինք, որովհետեւ մեր պատասխանատվությունը մենք կրում ենք»,-եզրափակեց Հովհաննես Իգիթյանը:
«Լուսավոր Հայաստան» խմբակցության ղեկավար Էդմոն Մարուքյանը հայտարարել է, որ ժամը 17-ին նշանակված նիստի մասին իրենց խմբակցությանը տեղեկացրել է ԱԺ աշխատակազմի ղեկավարը 17։05, երբ արդեն ֆիզիկապես անգամ չէին կարող ներկայանալ նիստին։

Աղբյուր` Փաստինֆո