Փաստ ինֆո

Դեռևս մարտի 14-ին ԱԳՆ-ն հերթական նախազգուշացումն է արել, որ ՀՀ քաղաքացիները զերծ մնան արտասահմանյան ուղևորություններից, ինչպես նաև հորդորել է ՝ ՀՀ քաղաքացիներին, ովքեր գտնվում են ՀՀ-ից դուրս, վերադառնան հայրենիք: Այս մասին ասուլիսին ասել է ԱԳՆ փոխնախարար Ավետ Ադոնցը: 

Նա հորդորեց արտերկրում գտնվող մեր քաղաքացիներին, որոնք ցանկանում են վերադառնալ, կապ հաստատել մեր դեսպանությունների հետ, ինչպես նաև՝ ԱԳ նախարարության հետ, որտեղ գործում են շուրջօրյա թեժ գծեր: Ադոնցի խոսքով՝ դա անհրաժեշտ նախապայման է, որը թույլ է տալիս գնահատել իրավիճակը:
Ադոնցը նշեց, որ բազմաթիվ օպերացիաներ են իրականացվել, օրինակ՝ տարհանումներ, թե Իտալիայից, թե Չինաստանից, իսկ այս գիշեր կազմակերպվել է Կալկաթա-Երևան հատուկ չվերթը, որտեղից վերադարձել են 68 երեխա և ուսուցիչ, ովքեր սովորում էին Կալկաթայի Հայոց բարեգործական դպրոցում:
Ադոնցը նշեց, որ, եթե չկան տարհանման գործողություններ, ապա դեսպանություններն ուղղորդում են քաղաքացիներին՝ շատ անգամ տեխնիկական աջակցություն ցուցաբերելով:

Անդրադառնալով դժվարություններին՝ Ադոնցն առանձնացրեց երեքը՝ տվյալ երկրում գործում են կարանտինային ռեժիմները, որոնք սահմանափակում են ազատության աստիճանը, տեղափոխման կամ տեղաշարժման ընթացքում առողջապահական ռիսկերը և օդային հաղորդակցության հետ կապված խիստ սահմանափակումները:

ԱԳՆ փոխնախարարը կոչ արեց քաղաքացիներին՝ որոշումն ընդունելուց հետո լավ տիրապետել իրավիճակին, կապի մեջ գտնվեն դեսպանությունների հետ:
Ադոնցը նշեց, որ օդային հաղորդակցության հետ կապված բավականին մեծ խնդիրներ կան:

«Եթե մեկ շաբաթ առաջ մենք հորդորում էինք, որ «Աերոֆլոտն» է միակ կանխատեսելի գործիքը՝ հայրենիք վերադառնալու առումով, ապա այսօր ավելի սահմանափակ են այդ հնարավորությունները: Եթե չի հաջողվում վերադառնալը, մեր դիվանագիտական ներկայացուցչություններն անում են ամենը, որպեսզի կարգավորվեն մեր քաղաքացիների ժամանակավոր կեցությունն այդ երկրում՝ ապահովելով մինիմում անհրաժեշտությունները՝ տեղը, սնունդը և մի փոքր ֆինանսական միջոցներ»,- նշեց Ադոնցը:

Նրա խոսքով՝ համակարգված աշխատանքներ են տարվում պարետատան և Առողջապահության նախարարության հետ, մասնավորապես՝ անհրաժեշտ մատակարարումներն իրականացնելու առումով՝ առողջապահական սարքավորումների և նյութերի ՀՀ մատակարարումը համակարգված աշխատանքի արդյունք պետք է լինի:

Ադոնցը նշեց, որ ՀՀ է ներմուծվել փոքրաքանակ, բայց անհրաժեշտ Քլորիքին դեղորայքը, որը պահանջված է աշխարհով մեկ:
Անդրադառնալով՝ միջազգային համագործակցությանը, Ադոնցն ասաց, որ բարձր է գնահատում աջակցությունը, որն իրականացվում է թե՛ Եվրոմիության, թե՛ ԱՄՆ-ի և Չինաստանի կողմից:

«Այս փոխգործակցությունը կարևոր է»,- նշեց Ադոնցը:

Աղբյուր` Փաստինֆո