Փաստ ինֆո

ԵԿՄ նախկին նախագահ, ԱԺ նախկին պատգամավոր Մանվել Գրիգորյանը գտնվում է տանը՝ վերակենդանացման սարքավորումներով և ստանում է համապատասխան դեղամիջոցներ, որոնք ոչ թե բուժման, այլ՝ պաթոլոգիական հիվանդությունների բացասական դինամիկան կանխարգելման համար են: Այս մասին «Փաստինֆո»-ի հետ զրույցում ասաց Մանվել Գրիգորյանի պաշտպանական խմբի անդամ Լևոն Բաղդասարյանը:

«Վերակենդանացման բաժանմունքի բոլոր սարքավորումներն ամրացված են նրան: Դա պարտադիր է: Օրը 24 ժամ նա դա կրում է»,- ասաց Բաղդասարյանը:

Նրա խոսքով՝ վերջին հետազոտություններով փաստվել են, որ ՀՀ-ում Գրիգորյանը չի կարող պատշաճ բուժօգնություն ստանալ, ինչի կապակցությամբ մասնագիտական կարծիք է հայտնել նաև բուժող բժիշկը;

«Այս ընթացքում դիմել ենք նաև ԱՆ նախարար Արսեն Թորոսյանին՝ ակնկալելով, որ կտա համապատասխան որոշում, մասնագիտական կարծիք: Այս պահի դրությամբ այն բացակայում է: Միջանկյալ պատասխան մենք ստացել ենք, բայց վերջնական՝ դրական կամ բացասական պատասխան չունենք»,- նշեց Բաղդասարյանը՝ հավելելով, որ նախարարին ուղղված գրությունը նաև ուղարկվել է ՄԻԵԴ և պատասխանը եւս կուղարկեն:

Հարցին, թե ՄԻԵԴ քանի բողոք է ներկայացվել այս ընթացքում, Բաղդասարյանը պատասխանեց. «ՄԻԵԴ ներկայացվել է մեկ գանգատ: Այդ գանգատում եղել է երկու պահանջ՝ ուղղված ՄԻԵԴ-ին: Փաստել ենք այն հանգամանքը, որ առկա է խոշտանգման փաստ և անօրինական կալանք: Անօրինական կալանքի հետ կապված՝ դատարանն իր վերաբերմունքն արտահայտեց՝ վերացնելով կալանքը, սակայն այդ պահանջից չենք հրաժարվել: Դիմում-գանգատի հիման վրա՝ ՄԻԵԴ-ը երկու միջանկյալ որոշում կայացրեց: Մի դեպքում, որ անհապաղ տեղափոխեն քաղաքացիական հիանդանոց և ըստ միջազգային չափանիշների՝ ապահովեն պատշաճ բուժօգնություն, ինչն այս պահի դրությամբ չի ստանում: Երկրորդ միջանկյալ որոշումը կայանում է նրանում, որ առաջնահերթության կարգով կլսի գանգատը: Երբ ներպետական ատյանը, դատարանը՝ դատավոր Մնացականյանի նախագահությամբ , վերանայեց կալանքի որոշումը, մենք իրազեկեցինք դա ՄԻԵԴ և ՄԻԵԴ-ը դա ընդունեց ի գիտություն, սակայն մենք չենք հրաժարվել մեր գանգատից»:

Դիտարկմանը, որ Մանվել Գրիգորյանի գործով դատական նիստերը պարբերաբար հետաձգվում են՝ կապված նրա առողջական վիճակի հետ և արդյո՞ք մոտակա Մանվել Գրիգորյանն ի վիճակի կլինել մասնակցել առաջիկայում նշանակված դատական նիստերին, Բաղդասարյանը պատասխանեց, որ բժիշկ չէ, բայց այնքանով, որքանով վիճակը հասկանալի է, թե ինչպիսին է, բնականաբար խոսք լինել չի կարող՝ դատական նիստերին ներկայանալու մասին:

«Եթե նախկինում մեկ-երկու անգամ, երբ գտնվում էր բուժման մեջ և նրան բերում էին սայլակով՝ ամրացված թթվածնով, այսօր բժիշկների ցուցումով դրան գումարվել է նաև այլ ցուցիչներ՝ մանիտորներով: Տեխնիկապես դա հնարավոր չէ: Բացի այդ՝ անձը գտնվում է կա՛մ սայլակի վրա, կա՛մ կիսանստած-կիսապառկած դիրքով: Անգամ այն պրոցեսը, երբ սայլակից տեղափոխվում է՝ նստելու, կիսանստելու կամ պառկելու, այսինքն՝ այն մեկ մետր տարածությունը, երբ օգնում են նրան, տեղափոխում են, մոտ կես ժամ միջամտություն է ցույց տրվում վերջինիս, որ շնչառությունը կարգավորեն»,- նշեց Բաղդասարյանը:

Հարցին, թե արդյո՞ք հնարավոր չէ դատական նիստերը կազմակերպել հեռավար մեթեդով՝ հաշվի առնելով Գրիգորյանի առողջական վիճակը, Բաղդասարյանը պատասխանեց, որ դա կապված է տեխնիկական միջոցների հետ:

«Հաշվի առնելով արդարադատության շահը՝ կարծում եմ, որ հնարավորինս արագ և օպերատիվ պետք է այդ գործառությները՝ դատարաններում տեխնիկական միջոցների վերազինումն իրականացվեն: Խոսքս վերաբերում է ոչ միայն քրեական գործերով, մասնավորապես՝ Մանվել Գրիգորյանի գործով, այլև՝ քաղաքացիական և վարչական գործերով»,- նշեց Բաղդասարյանը՝ հավելելով, որ դատական իշխանությունը պետք է հնարավորություն ստեղծի, որպեսզի իրավաբանական անձինք կարողանան գոնե մինիմալ կերպով իրենց իրավունքները ներկայացնել:

Դիտարկմանը, որ հարցը միայն կորոնավիրուսով պայմանավորված արտակարգ դրությանը չի վերաբերում, այսինքն՝ արտակարգ դրության ավարտից հետո էլ գուցե Մանվել Գրիգորյանի առողջական վիճակում դրական դինամիկա չարձանագրվի, Բաղդասարյանը պատասխանեց. «Եթե անձն ունի հիվանդության հետ կապված խնդիրներ, արդարության մասին խոսք լինել չի կարող: Պետք է հնարավորություն ստեղծել, որպեսզի անձը կարողանա վերականգնել առողջությունը, ապա՝ իրականացնել արդարադատություն: Այդ մշակույթը պետք է մեր դատական համակարգում մտցնել: Իսկ հեռավար արդարադատությունների, հեռավար ուսուցման հետ կապված, ըստ էության, ճիշտ նկատեց վարչապետը՝ իրավիճակ է փոխվում և համաձայն՝ իրավիճակի փոփոխության, յուրաքանչյուրը պետք է կարողանա իր գործառույթն իրականացնի»:

Հիշեցնենք՝ Մանվել Գրիգորյանը մեղադրվում է ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակություն կազմակերպելու մեջ:

Հեղինակ՝ Իզաբել Սահակյան

Աղբյուր` Փաստինֆո