Փաստ ինֆո

Եթե իշխանությունները գնում են այսպիսի սահմանափակումների, ապա պետք է հստակ, պարզ, հասկանալի բացատրություններ տրվեն: Այս մասին լրագրողների հետ զրույցում ասաց ԱԺ «Բարգավաճ Հայաստան» խմբակցության քարտուղար Արման Աբովյանը անդրադառնալով «Արտակարգ դրության իրավական ռեժիմի մասին» օրենքում լրացումներ կատարելու մասին և «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի փաթեթին:

«Երբ երկրորդ ընթերցումից առաջ պարոն Բադասյանը ներկայացնում էր փոփոխությունները, որոնք, ըստ էության, փոփոխություններ էլ չեն, թեթև, կոսմետիկ շտկումներ են, ասաց, որ միջազգային պրակտիկայում սա վերջին քայլն է: Երբ վիճակն արդեն այնքան սրվում է, որ պետք է որոշակի վճռական քայլեր կատարել: Եթե վիճակը սրվել է, թող հայտարարեն ինչումն է այդ սրացումը և ինչ ու են այսպես համառորեն այս օրինագիծը փորձում ընդունել»,-ասաց Արման Աբովյանը:

Վերջինս նկատեց այստեղ գոյություն ունի նաև արդյունավետության հարցը: Նրա կարծիքով այն ռեսուրսները, միտքը և գաղափարը, որը դրված է այդ օրինագծի մեջ, չի համապատասխանում այսօրվա իրական մարտահրավերներին. «Ենթադրենք սրա նման չէ, նմանատիպ, ավելի թեթև օրինագիծ լիներ, բայց այդ օրինագիծը նույնիսկ այսօր չի կարելի ընդունել: Դա պետք է շուտվանից ընդունվեր մինչև համաճարակի տարածումը: Հիմա այդ օրինագծի էֆեկտիվությունը որպես համաճարակի դեմ պայքարելու որոշակի գործիք, շատ ցածր է»,-նշեց պատգամավորը` հավելելով, որ խմբակցության դիրքորոշումը չի փոխվել և ԲՀԿ-ն դեմ է այս օրինագծին:

Աղբյուր` Փաստինֆո