Փաստ ինֆո

Զանգերի և տեղորոշման վերաբերյալ տեղեկատվության հավաքագրումը վերաբերում է բոլոր քաղաքացիներին, սակայն հնարավոր է, որ այս տեղեկատվությունը կարող է հետաքրքրություն չներկայացնել ,սա այնքանով է կարևոր, որքանով կարող է արձանագրվել շփում՝ վարակակրի կամ կոնտակտավոր անձանց հետ։ Այս մասին այսօր ԱԺ արտահերթ նիստի ժամանակ ասաց ՀՀ Արդարադատության նախարար Ռուստամ Բադասյանը։ Ինչպես արդեն տեղեկացրել ենք՝ կառավարությունն առաջարկում է փոփոխություն կատարել «Արտակարգ դրության իրավական ռեժիմի մասին» օրենքում լրացումներ կատարելու մասին, «Էլեկտրոնային հաղորդակցության մասին»  մասին օրենքներում եւ հասանելիություն ստանալ մարդկանց անձնական տվյալներին՝ նրանց գտնվելու վայրի մասին, ում հետ են հեռախոսազրույց ունեցել, որքան է այն տեւել եւ այլն։

Խոսելով տեղորոշման հնարավորության մասին՝ Բադասյանն ասաց, որ եթե քաղաքացին սմարթֆոն չունի, ապա հնարավոր է նրան սմարթֆոն տրամադրվի, կամ էլ մեկուսացման, ինքնամեկուսացման այլ միջոցառումներ ձեռնարկվեն, այս ուղղությամբ քննարկումները շարունակվում են։

Նա հայտնեց, որ փաթեթով նշված գործառույթներն իրականացնելու է «էկենգ» կազմակերպությունը, որն ունի համապատասխան տեխնիկական միջոցները բոլոր օպերատորներից ստացված տեղեկատվությունը մեկտեղելու համար։ Կառավարության որոշմամբ ոստիկանությունը, ազգային անվտանգության ծառայությունն էլ կարողանալու են վերահսկողություն իրականացնել։
ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը հարցրեց, թե ԱԱԾ-ի ու Ոստիկանության նկատմամբ ո՞վ է հսկողություն իրականացնելու, որպեսզի հանրությունը վստահ լինի, որ ինչ-որ պահի այս մարմինների մտքով չի անցնի ծանոթանալ հեռախոսազրույցների կամ հաղորդագրությունների բովանդակությանն ու հետագայում ինչ-ինչ նպատակներով դրանք օգտագործել։

«Իսկ հիմա ո՞վ է վերահսկողություն իրականացնում ԱԱԾ-ի և Ոստիկանության գաղտնալսումների մասով։ Եվս մեկ անգամ շեշտեմ, որ խոսքը գաղտանլսումների մասին չէ, բայց վերահսկողությունը կայանում է նրանում, որ դա հնարավոր է իրականացնել բացառապես դատական սանկցիայիով, ցանկացած այլ գաղտնալսում իրենից հանցագործություն է ներկայացնում և նման դեպքերում անձը ենթակա է քրեական պատասխնատվության»,-ասաց Բադասյանը։
ԱԺ նախագահ Արարատ Միրզոյանն էլ հետաքրքրվեց, թե պետությանն ինչ է տալու տեղեկատվությունը, թե երկու անձինք x վայրից քանի անգամ են միմյանց հետ խոսել։

«Պատկերացնենք ինձ մոտ հայտնաբերվում է կորոնավիրուս նախորդ 14 օրվա ընթացքում իմ զանգերի ու կոնտակտների վեր հանումը ու օրինակ հեռախոսազանգով ճշտումը՝ արդյոք ես ու ինձ հետ հեռախոսով խոսող անձը հանդիպել ենք թե ոչ։ Անձը կարող է դրա մասին մոռանալ նույնիսկ։ Իսկ այս կերպ տեղաշարժման ու զանգերի համադրումը միջոցառումներ իրականացնելու հնարավորություն կտան»,-նշեց նախարարը։

Միրզոյանն արձագանքելով ասաց, որ իր պատկերացմամբ այս միջոցառումը ստեղծված իրավիճակում ավելորդ է, ապա հետաքրքրվեց Կառավարության հնարավորությունները որքանով կսահմանափակվեն, եթե ԱԺ-ն առաջարկի առայժմ ձեռնպահ մնալ այս կարգավորումից։ Նախարարն էլ նշեց, որ ինքնանպատակ չէ նշված տեղեկատվության ֆիքսումը, դա իրականում տեղեկատվական տեխնոլոգիաների մասնագետների կարծիքների հիման վրա է մշակվել։

Նա նաև շեշտեց, որ այս 2 կետերի համադրումն էական նշանակություն ունի, և եթե կետերից մեկից հրաժարվեն աշխատանքներն արդյունավետ չեն լինի։

Աղբյուր` Փաստինֆո