Փաստ ինֆո

Եվ այսպես, Ազգային ժողովն առաջին ընթերցմամբ ընդունեց «Արտակարգ դրության իրավական ռեժիմի մասին» օրենքում լրացումներ կատարելու մասին և «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի փաթեթը։

ՈՒ թեպետ խորհրդարանական ընդդիմությունը՝ ԲՀԿ-ն և «Լուսավոր Հայաստանը» դեմ քվեարկեցին, թեպետ բազմաթիվ պատգամավորներ, այդ թվում նաև՝ իմքայլական, իրենց ելույթների ընթացքում կանգ առան ու մատնանշեցին ներկայացված նախագծի տողատակերը, խութերն ու խոռոչները, ժողովրդավարության, մարդու իրավունքների և ազատությունների տոտալ սահմանափակումները, այնուհանդերձ, պատգամավորական մեծամասնությունը կողմ քվեարկեց:

Իսկ տվյալ փաթեթով առաջարկվում է հասանելիություն մարդկանց անձնական տվյալներին՝ նրանց գտնվելու վայրին, բոլոր հաղորդագրություններին և հեռախոսազրույցներին, նույնիսկ դրանց տևողությանը, ըստ էության, նաև՝ հեռախոսահամարով պայմանավորված մնացած հավելվածներին:

Ընդ որում, ամենավիրավորականն այն է, որ այս ամենն արվում է պանդեմիայի համատեքստում սահմանված արտակարգ դրության պայմաններում և վկայակոչելով համաճարակային իրավիճակի վրա վերահսկողություն իրականացնելու և վարակը կանխարգելելու կառավարության մտահոգությունը և ծրագրային քայլերը:

Իրականում, սա կառավարության՝ մարդկանց անձնական տվյալներ մուտք գործելու բնավ էլ առաջին փորձը չէ, եթե հիշում եք, որոշ ժամանակ առաջ էլ ԱԱԾ-ից զատ ոստիկանությանը ևս օրենսդրորեն իրավունք տրվեց գաղտնալսումներ իրականացնելու:

Այս նախագծով, ըստ էության, օրինական բնույթ է տրվում ՀՀ բոլոր քաղաքացիների տվյալների հավաքագրմանը, որոնց կառավարման և մշակման իրավունք է վերապահվում IT ոլորտը ներկայացնող ինչ-որ կազմակերպության:

Մեկ այլ հարց է առաջանում, արդյո՞ք այս նախագծի իրականացման համար բյուջետային միջոցներ են ծախսվելու, թե՞ արդարադատության նախարարությունն այն իրականացնելու է ինչ-որ միջազգային կազմակերպությունից կամ հիմնադրամից տրվող օտար փողերով՝ գրանտային ծրագրերի շրջանակում: Ի վերջո, ի՞նչ երաշխիք, որ այդպիսով գլոբալիստական որոշ շրջանակների պատվերը կամ հանձնարարությունը չի կատարվում:

Ընդհանրապես, ըստ իս, այսօր ԱԺ-ում ներկայացված նախագծի նախապատրաստական, այսպես կոչված՝ փուլային տարբերակը մեզանում «տանը մնալու» անցյալ շաբաթվա ընթացքում իրականացվեց այսպես կոչված՝ ,,Արտակարգ դրության ժամանակահատվածում տեղաշարժման թերթիկի ,, էլեկտրոնային տարբերակի միջոցով, որտեղ ի տարբերություն հումորի ժանրում իր տեղը գտած թղթային տարբերակի՝ հեռախոսահամարի նշման պահանջ կար: Ըստ ամենայնի, կարևորն այն չէր այս դեպքում, թե վերջինիս արձագանքողները քիչ կամ շատ եղան: Կարևոր էր այն, որ կորոնավիրուսի հետ կապված հույժ անձնական տվյալի՝ հեռախոսահամարի անհրաժեշտության հարցը բարձրացվեց: ՈՒ հիմա այդ պահանջից ելնելով էլ, թերևս, արդարադատության նախարարությունը փաթեթային տարբերակով դիմել է առավել կտրուկ քայլերի, ինչն ինքնին վտանգավոր է, որքան էլ սահմանափակ ժամանակային կտրվածքով լինի այն:

Եվ սա հեղինակել է ՀՀ կառավարությունը՝ հանձինս ՀՀ արդարադատության նախարարության:

Հեղինակ Ա.Ե.

Աղբյուր` Փաստինֆո