Փաստ ինֆո

Ազգային ժողովն արտահերթ նիստ է անցկացնում։ Օրակարգը ներկայացնելիս Արդարադատության նախարար Ռուստամ Բադասյանն ասաց, որ այսօր 4 հարց է քննարկվելու։

«Առաջարկում եմ մարտի 30-ին գումարված արտահերթ նիստի հարցերի, բացառությամբ համաձայնագրի, երկրորդ ընթերցումը կազմակերպել առաջին ընթերցմամբ ընդունումից հետո՝ 24 ժամվա ընթացքում»,-ասաց Բադասյանը։

Խոսելով օրակարգի առաջին հարցի մասին, որով նախատեսվում է լրացումներ ու փոփոխություններ կատարել «Արտակարգ դրության իրավական ռեժիմի մասին» և լրացումներ կատարելու մասին «Էլեկտրոնային հաղորդակցության մասին» ՀՀ օրենքներում՝ Բադասյանն ասաց․ «Հաշվի առնելով կորոնավիրուսի պանդեմիայի տարածումն ու դրա տեմպերը անհրաժեշտություն է առաջացել ժամանակակից տեխնոլոգիաների՝ պանդեմիայի կանխման միջոցառումներ իրականացնել։ Այդ նպատակով ստեղծվել է հատուկ խումբ, որը ներառել է թե՛ հայաստանյան, թե՛ արտասահմանյան վերլուծաբանների, տվյալագետների, տեղեկատվական տեխնոլոգիաների և արհեստական բանականության մասնագետների, որոնք մշակել են պադեմիայի կանխարգելման ամենաարդյունավետ միջոցները»։

Նա նշեց, որ այս փաթեթով առաջարկվում է օպերատիվ կերպով ներդնել ժամանակակից էլեկտրոնային միջոցների և թվային տեխնոլոգիաների կիրառման միջոցով համաճարակի կանխարգելման նոր մեխանիզմ ։

Արդարադատության նախարարն անցում կատարելով օրակարգի երկրորդ հարցին, այն է «Բնակչության բժշկական օգնության եւ սպասարկման մասին» օրենքում լրացումներ կատարելու մասին նախագծին, ասաց, որ դրա հրատապությունը կայանում է նրանում, որ ՀՀ-ում գործող անատոմիական ծառայություն մատուցող կազմակերպությունները չունեն կորոնավիրուսային հիվանդության հետևանքով մահացած անձանց հերձում իրականացնելու համար անհրաժեշտ պայմաններ ու դրանք չեն բավարարում միջազգային պահանջներին։

«Հաշվի առնելով այն հանգամանքը, որ նշված հիվանդության վարակելիության աստիճանը դեռևս ամբողջությամբ բացահայտված չէ, ինչը կարող է հերձման արդյունքում առաջացնել վարակի տարածման անդառնալի հետևանքներ, ինչպես նաև բացահայտված չէ դիակի մեջ կորոնավիրուսային հիվանդության ապրելիության ժամանակահատվածը, անհրաժեշտ է, ըստ բժշկական փաստաթղթերի կորոնավիրուսային հիվանդության հետևանքով անձի մահվան դեպքերում չիրականացնել հերձում, ինչն էլ վկայում է «Բնակչության բժշկական օգնության եւ սպասարկման մասին» օրենքում լրացումներ կատարելու անհրաժեշտության մասին»,-ասաց Բադասյանը։

Նախարարը ներկայացրեց նաև «Բաժնետիրական ընկերությունների մասին» Հայաստանի Հանրապետության օրենքում փոփոխություններ եւ լրացումներ կատարելու մասին, «Բանկերի եւ բանկային գործունեության մասին» Հայաստանի Հանրապետության օրենքում փոփոխություն եւ լրացումներ կատարելու մասին, «Ապահովագրության եւ ապահովագրական գործունեության մասին» Հայաստանի Հանրապետության օրենքում փոփոխություններ եւ լրացումներ կատարելու մասին նախագծերի փաթեթը ու ասաց, որ նախագծի հրատապությունը կապված է ընկերությունների հեռակա տարեկան ժողովներ անցկացնելու և քվեարկություն իրականացնելու անհրաժեշտությամբ։

«Եվ մյուս հարցը Հայաստանի Հանրապետության ու Վերակառուցման եւ զարգացման միջազգային բանկի միջեւ «Կենսական նշանակության ճանապարհային ցանցի բարելավման ծրագրի երկրորդ լրացուցիչ ֆինանսավորում» վարկային համաձայնագիրը վավերացնելու մասին նախագծին է, սա միակ բացառությունն է, որ 24 ժամյա ռեժիմ չենք պահանջում։ 2019թ-ի հոկտեմբերի 19-ին Երևանում Հայաստանի Հանրապետության և վերակառուցման և զարգացման միջազգային բանկի միջև ստորագրվել է թիվ 89․57AM կենսական նշանակության ճանապարհային ցանցի բարելավման ծրագրի երկրորդ լրացուցիչ ֆինանսավորման վարկային համաձայնագիրը, որի 4-րդ հոդվածի 4․02 կետի համաձայն վարկային համաձայնագրի ուժի մեջ մտնելու վերջնաժամկետը ստորագրված համաձայնագրի ուժի մեջ մտնելուց հետո 180 օր է, որը լրանում է 2020թ-ի ապրիլի 7-ին»,-ասաց Բադասյանը։

Աղբյուր` Փաստինֆո