Փաստ ինֆո

Իրական շփման մասին տեղեկություն ստանալու համար պետք է լսենք խոսակցությունը՝ խոսակցության բովանդակությունը, ինչը Սահմանադրության 33-րդ հոդվածի խախտում է: Այս մասին «Փաստինֆո»-ի հետ զրույցում ասաց փաստաբան Նորայր Նորիկյանը:

«Միայն կոնտակտների վերաբերյալ տեղեկատվության ստանալը չեմ կարծում, որ բավարար է լինելու կորոնավիրուսով վարակվածների հստակ շրջանակի մասին ամփոփ տեղեկատվությանը տիրապետելու համար: Այսօր` նոր տեխնլոգիաների պայմաններում, մարդկանց հաղորդակցման միջոցները բազմազան են: Մարդիկ իրար հետ փոխանցում են տարբեր տեղեկություններ՝ հաղորդագրությունների միջոցով, էլեկտրոնային փոստերի միջոցով,սոցիալական այլ կապերի միջոցով, մասնավորապես՝ վայբերով, վոթսափով ... Իսկ այդ միջոցների կիրառման դեպքերում արդյո՞ք մենք հասնելու ենք այս օրենքով մեր առջև դրված խնդրի լուծմանը: Կարծում եմ, որ սա այն լավագույն գործիքը չէ, որ կիրառվել է, ավելին՝ սրանով Սահմանադրության 33-34-րդ հոդվածների ֆորմալ առումով կարգավորումների տրամաբանության շրջանակներում է իրականացվում, բայց ցանկացած օրենքի հիմնական նպատակը, վերջիվերջո, այդ օրենքի կիրառումից արդյունք ստանալու մեջ է»,- ասաց Նորիկյանը:

Ըստ նրա՝ Կառավարությունն արդեն պետք է գտած լիներ արդյունավետ գործիքը, որով հնարավորություն կլիներ լուծել այս համաճարակի դեմն առնելու խնդիրները, քանի որ արդեն շուրջ 14-րդ օրն է, ինչ գտնվում ենք արտակարգ դրության մեջ:

«Արտակարգ դրություն հայտարարելուց բխող միջոցառումների ցանկում պարետի կողմից կայացվել են մի շարք ցուցումներ և որոշումներ և ես ամենապատասխանատու ձևով հայտարարում եմ, որ այդ որոշումներն ու ցուցմուներն անվերապահորեն չեն կատարվում, այսինքն՝ իրականացվում է մեղմ քաղաքականություն, այն դեպքում, երբ իմ խորին կարծիքով, տվյալ համաճարակի դեմն առնելու համար պետությունը պետք է իրականացներ իր հարկադրանքի համաչափ և իրավաչափ գործիքակազմն ամբողջությամբ՝ ըստ անհրաժեշտության»,- ասաց Նորիկյանը:

Հարցին, թե արդյո՞ք երաշխիք կա, որ արտակարգ դրության ավարտից հետո էլ այդ գաղտնալսումները կպահվեն անորոշ ժամկետով և չեն օգտագործվի, Նորիկյանը պատասխանեց, որ նման իրավասություն կարող է տրվել միայն արտակարգ դրության հայտարարման ժամանակահատվածում և արտակարգ դրությունից հետո նման իրավասություն չի կարող տրվել որևէ մարմնի, ավելին՝ եթե այդ օրենքն ընդունվի, ապա պետք է այնպես ընդունվի, որ արտակարգ դրության ժամկետի ավարտից հետո ամբողջ տեղեկատվությունը ոչնչացվի և կիրառելի չլինի:

Մանրամասները՝ տեսանյութում

Աղբյուր` Փաստինֆո