Փաստ ինֆո

Ազգային ժողովը արտահերթ նիստի շրջանակներում քննարկում է «Արտակարգ դրության իրավական ռեժիմի մասին» օրենքում լրացումներ կատարելու մասին, «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի փաթեթը։

Ներկայացնելով նախագծերը՝ Արդարադատության նախարար Ռուստամ Բադասյանն ասաց, որ  առաջարկվում է  արտակարգ դրության ժամանակ, եթե այն առաջացել է համաճարակի հետևանքով,  միջամտություն իրականացնել նաև անձնական տվյալների պաշտպանության, մասնավոր և ընտանեկան կյանքի անձեռնմխելիության, հաղորդակցության ազատության և գաղտնիության իրավունքներին։

«Սա բացառապես վերաբերում է համաճարակի հետևանքով առաջացած արտակարգ իրավիճակի հիման վրա արտակարգ դրություն հայտարարելուն, այսինքն՝ այլ արտակարգ դրությունների դեպքում այս տվյալներին միջամտություն չի ենթադրվում։ Այս միջամտությունը սահմանափակ է, բնականաբար ամբողջ ծավալով չի միջամտում նշված իրավունքներին և կատարվում է բացառապես արտակարգ դրության շրջանակներում, ավարտվում  է արտակարգ դրության ավարտմամբ կամ էլ համապատասխան միջոցառման ավարտմամբ»,-ասաց Բադասյանը։

Նա հայտնեց, որ այս կերպ հնարավոր է լինելու պարզել հաճախորդի տեղորոշումը, ձեռք բերել հաճախորդի հեռախոսահամարի հետ ուղիղ կամ անուղղակի միջնորդավորված կապ ունեցող հեռախոսահամարները, հեռախոսային խոսակցություններ սկսելու ամսաթիվ, սկիզբը և ավարտը․ «Իսկ հեռախոսային զանգի վերահասցեագրման կամ փոխանցման դեպքում այն հեռախոսահամարի վերաբերյալ տվյալները, որին փոխանցվել է զանգը։Նույն համակարգում ամփոփվելու են նաև բժշկական գաղտնիք համարվող տեղեկությունները՝ անձանց վարակման, վարակումը ստուգելու նպատակով հավաքագրված տվյալների, անձի հետազոտություն անցնելու մասին տեղեկությունները»։

Բադասյանն ընդգծեց՝ անհրաժեշտություն է առաջացել օնլայն տարբերակով հավաքագրել բոլոր տեղեկությունները, որպեսզի անձի մոտ վարակի հաստատման դեպքում, տեղորոշվի անձանց այն շրջանակը, ովքեր հնարավոր կոնտակտ են ունեցել վարակված անձի հետ։

«Ուզում եմ հատուկ շեշտել, որ հեռախոսազանգերի կամ հաղորդագրությունների բովանդակությունը հասանելի չի լինելու, այսինքն` չի թույլատրվում համաճարակի կանխարգելման նպատակով հեռախոսազանգերի կամ հաղորդագրությունների բովանդակությանը ծանոթանալ։ Այս օրենքով չսահմանված տեղեկատվության օգտագործման դեպքում առկա է նաև քրեական պատասխանատվություն քրեական օրենսգրքի 144,145 և 146-րդ հոդվածներով»,-ասաց նախարարը։

Նա հայտնեց, որ նաև առաջարկում է ներդնել համապատասխան ծրագրեր, որոնց միջոցով հնարավոր կլինի ստուգել անձանց առողջական վիճակի մասին տվյալներ,  ներկայացնել ինքնամեկուսացման կամ մեկուսացման պահանջներ ու իրականացնել որոշակի վերահսկողություն։

Աղբյուր` Փաստինֆո