Փաստ ինֆո

Սա բավականին հաջողված նախագիծ է, որովհետև արդյունավետ կերպով փոխհավասարակշռում է հանրային շահը մասնավոր շահի հետ: «Փաստինֆո»-ի հետ զրույցում նման կարծիք հայտնեց միջազգային իրավունքի փորձագետ Արա Ղազարյանը՝ անդրադառնալով «Արտակարգ դրության իրավական ռեժիմի մասին» օրենքում այն փոփոխություններին, որոնցով նախատեսվում է միջամտություն իրականացնել անձնական տվյալների պաշտպանության, մասնավոր և ընտանեկան կյանքի անձեռնմխելիության, հաղորդակցության ազատության և գաղտնիության իրավունքներին:

Փորձագետի խոսքով՝ նախագծում նշվում են բազմաթիվ հակակշիռներ, որոնք կարող են երաշխիք հանդիսանալ, որ տվյալներ մշակողը խախտումներ կամ չարաշահումներ չանի: Մասնագետը գտնում է նախագծում սահմանված են եվրոպական բոլոր կարևորագույն սկզբունքները, մնացածը կախված է կիրառությունից:

Դիտարկմանը, որ տվյալները հանձնվելու են մասնավոր ընկերության, Արա Ղազարյանը նկատեց դա պետք է կատարվի շատ ամուր երաշխիքների ներքո, որպեսզի տվյալների արտահոսք չլինի և նախագծի բոլոր դրույթները, այդ թվում նաև տվյալները ոչնչացնելու պահանջները գործեն նաև երրորդ անձի նկատմամբ. «Քաղաքացիների մոտ, իհարկե, անհանգստություն կա արդյոք այդ տվյալները կշարունակվեն պահպանվել արտակարգ դրության ռեժիմից հետո, թե ոչ: Սա ընդհանուր մտահոգություն է, բայց ունենք այն, ինչ ունենք, և այս օրենքը խիստ անհրաժեշտ է: Կարևորն այն փոխհավասարակշռում է հանրային և մասնավոր շահերը: Օրենքն ամբողջությամբ գործելու է վարչարարության ափսեի մեջ, իսկ վարչարարությունը մի կառուցակարգ է, որ արդեն 10 տարուց ավել գործում է Հայաստանում և այնտեղ բազմաթիվ ընթացակարգեր կան և' բողոքարկման, և' տեղեկատվություն հայցելու և այլն: Վարչարարությունն այդ ամբողջ երաշխիքները պետք է տրամադրի, ուստի յուրաքանչյուր քաղաքացի այնուհետև իրավունք ունի դիմելու և պարզելու իր վերաբերյալ տվյալները ոչնչացվել են, թե ոչ»,-ասաց Արա Ղազարյանը:

Վերջինս նկատեց խնդրահարույց հարց է տեսնում այստեղ արդյոք օպերատորը, ում առաջադրվելու է տվյալներ տրամադրել, անվերապահորեն տրամադրելու է դրանք, թե կարող է նաև մերժել. «Եթե ընդհանուր վարչարարության կոնտեքստում նայենք, կարող է նաև մերժել: Գուցե այս օրենքի խնդիրը չէ դա կարգավորել և թողնվում է ընդհանուր վարչարարության հիմունքով: Հակակշիռն այն է, որ սա ժամանակավոր միջոցառում է, և սա արվում է մարդկանց կոնկրետ խմբի նկատմամբ, այլ ոչ թե բոլորի: Սա չի կարող բոլորի նկատմամբ անվերապահորեն կամ ապրիորի կիրառվել»,-ասաց փորձագետը:

Հարցին արդյոք որքանով է օգնելու վիրուսի կանխարգելմանը հեռախոսազանգի տևողությունը, Արա Ղազարյանը նկատեց դրանք պարզապես մետրիկ տվյալներ են. «Գուցե ավելին են, քան անհրաժեշտ է, բայց դրանք մետրիկ տվյալներ են: Մտածմունքն այն է, որ հանկարծ բովանդակությունը չհաղորդեն, բայց հստակ նշվում է, որ բովանդակության հետ գործ չունեն, միայն մետրիկ տվյալների վերծանումներ են ուզում: Հեռախոսազանգի տևողությունը վերաբերելի ինֆորմացիա է, թե ոչ, որոշ հանգամանքներում գուցե վերաբերելի լինի: Պետք է տեսնենք ինչպես է կիրառվում, նոր որոշենք: Որևէ տվյալ, եթե անհրաժեշտաբար չի կիրառվում, ուրեմն պետք է չմշակվի, այսինքն` այն պետք է ոչնչացվի»,-հավելեց Արա Ղազարյանը` ընդգծելով, որ եթե նախագիծն այսպես կիրառվի, ապա այն բավականին փոխհավասարակշռված է:

Աղբյուր` Փաստինֆո