Փաստ ինֆո

Ես մշտապես եղել եմ, կամ և կմնամ պանդեմիայի դեմ պայքարի հարցում առավել կոշտ միջոցների կիրառման կողմնակից, սակայն միջոցառումը պետք է լինի և՛ կոշտ, և՛ արդյունավետ։ Այս մասին այսօր ԱԺ արտահերթ նիստի ժամանակ ասաց «Իմ քայլը» խմբակցության պատգամավոր, պետաիրավական հարցերի մշտական հանձնաժողովի նախագահ Վլադիմիր Վարդանյանը։

Նա նշեց, որ եթե միջոցառումը կոշտ է, բայց արդյունավետ չէ, ապա այն չի համապատախանում այն չափանիշներին, որոնք նախատեսվում են իրավական նորմերով, Սահմանադրությամբ և միջազգային պարտավորություններով։

«Այո, ես չեմ բացառում, որ կարող է ինչ-որ փուլում, իրոք, անհրաժեշտություն լինի օգտագործել նաև հեռահաղորդակցության միջոցները, քանի որ այլևս մարդկային շփման մակարդակով հնարավորություն չի լինի բոլորին հասցնել տեղեկատվություն։ Սա պետք է լինի որպես վերջին հնարավորություն։ Հասե՞լ ենք այդ փուլին, թե՞ ոչ , ես չգիտեմ՝ մասնագետ չեմ»,-ասաց Վարդանյանը։

Նա ընդգծեց՝ կորոնավիրուսով վարակվածները հանցագործներ չեն ու չեն ցանկանում թաքցնել որևէ բան․ «Ես պաշտոնապես հայտարարում եմ, որ պատկան մարմինները իրավունք ունեն իմ վերաբերյալ ցանկացած տեղեկատվություն՝ հեռախոսազանգեր, տեղորոշում, այդ ամենը հանգիստ ուսումնասիրել, ես տալիս եմ իմ համաձայնությունը, տալիս եմ կամավոր, որովհետև հասկանում եմ, որ դա պետք է, և գուցե մենք այս փուլն էլ պետք է անցնենք, նոր գնանք առաջ»,-ասաց հանձնաժողովի նախագահը։

Աղբյուր` Փաստինֆո