Փաստ ինֆո

Ինձ համար անհասկանալի է, թե ինչ ազդեցութուն է ունենալու կորոնավիրուսով վարակված անձի զանգերի ժամը ֆիքսելը։ Նշում եք, որ դա կոնտակտավորներին հայտնաբերելու համար է, սակայն կոնտակտավոր կարող է լինել ցանկացած անձ, որը տվյալ վարակակրի հետ գտնվել է նույն տարածքում՝ խանութում, տրանսպորտում, փողոցում և այլն։ Այս մասին այսօր ԱԺ արտահերթ նիստի ժամանակ ասաց «Իմ քայլը» խմբակցության պատգամավոր, Առողջապահության եւ սոցիալական հարցերի մշտական հանձնաժողովի նախագահ Նարեկ Զեյնալյանը։

Նա նշեց, օրինակ՝ ինքը օրական խոսում է 30-ից 40 մարդու հետ, սակայն հնարավոր է նրանցից և ոչ մեկի հետ չհանդիպի․ «Անհասկանալի է, թե սա ինչպես է նպաստելու կոնտակտավորի հայտնաբերմանը»։

Հանձնաժողովի նախագահը հետաքրքրվեց, արդյոք այս հարցի մշակման ժամանակ կառավարությունը համագործակցել է որևէ էպիդեմիոլոգի հետ։

«Եթե հայտնաբերել ենք, ֆիքսել ենք հիվանդ անձ, փորձում ենք բացահայտել 14 օրվա ընթացքում ում հետ է այդ անձը հանդիպել կամ կոնտակտ ունեցել։ Էպիդեմիոլոգիական շղթան կամ կոնտակատվորին հայտնաբերելու տեսակետից ես վստահեցնում եմ, որ սա 0-ական էֆեկտ ունի։ Եթե մեկ օրից ավել է անցնում, ապա բացարձակ որևէ էֆեկտ չունեն այդ միջոցառումները։ Ենթադրենք 5 օր առաջ հանդիպել է անձի հետ, սակայն այդ մեկ օրվա ընթացքում այդ անձը հանդիպել է ևս 50 հոգու հետ, որից հետո այդ 50 հոգին հանդիպել են 500 հոգու հետ»,-ասաց Զեյնալյանը։

Ամփոփելով խոսքը՝ նա ընդգծեց, որ էպիդեմիոլոգիական տեսակետից այս նախագիծը ձգտում է 0-ի։

Հիշեցնենք, որ ԱԺ արտահերթ նիստում քննարկվում է «Արտակարգ դրության իրավական ռեժիմի մասին» օրենքում լրացումներ կատարելու մասին, «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի փաթեթը, որով կառավարությունն առաջարկում է հասանելիություն ստանալ մարդկանց անձնական տվյալներին՝ նրանց գտնվելու վայրի մասին, ում հետ են հեռախոսազրույց ունեցել, որքան է այն տեւել եւ այլն։

Աղբյուր` Փաստինֆո