Փաստ ինֆո

Կորոնավիրուսի համաճարակը բարենպաստ պայմաններ ստեղծեց աշխարհի տարբեր ծայրերում սովորող երիտասարդների համար` վերադառնալ տուն և ընտանիքի հետ անցկացնել որոշ ժամանակ: «Փաստինֆո»-ին մեկուսացման իր օրերի մասին է պատմել  Աննա Մելաձեն: Նա Բաթումի քաղաքից է, սակայն արդեն չորս տարի է ապրում է Թբիլիսիում, սովորում միջազգային հարաբերությունների ֆակուլտետում: Համաճարակը, սակայն, լավ առիթ հանդիսացավ, որպեսզի Աննան վերադառնա հայրենի քաղաք և իր ժամանակն անցկացնի ծնողների հետ:

Իրավիճակը Վրաստանում

Իրավիճակն իսկապես վերահսկողությունից դուրս է: Զարմանում եմ` ինչպես է կարողանում կառավարությունը զբաղվել այս խնդրով: Վրաստանում կա հաստատված 85 դեպք, 14 մարդ արդեն ապաքինվել է և բարեբախտաբար երկրում մահացության դեպքեր չունենք: Վրաստանը ի տարբերություն Եվրոպայի ավելի շուտ փակեց ուսումնական հաստատությունները և դա նույնպես լավ աշխատեց: Սահմանները փակ են, դադարեցված են նաև միջազգային չվերթները: Իրականացվում են չարթերային չվերթներ` Վրաստանի քաղաքացիների համար: Վերջիններիս կառավարությունը 14 օրով մեկուսացնում է հյուրանոցներում: Աշխատում են միայն մթերային խանութները և դեղատները: Կորոնավիրուսի ամենաշատ դեպքերը գրանցվել են Թբիլիսիում և Մառնեուլիում, որտեղ էթնիկ փոքրամասնություններն են ապրում: Ամբողջ Մառնեուլին այժմ կարանտինի մեջ է, քանի որ վարակակիր մի կին այնտեղ թաղման արարողության է մասնակցել ևշատ մարդկանց հետ շփվել: Այժմ կառավարությունն այնտեղի յուրաքանչյուր տուն բժիշկ է ուղարկում` ստուգելու մարդկանց:

Աննան ամբողջ օրը տանը մնալուց չի ձանձրանում

Անկեղծ ասա ես սիրում եմ տանը մնալ, դրա համար ստեղծված իրավիճակն ինձ ամենևին չի ճնշում: Ես սովոր եմ: Բայց երբեմն դուրս եմ գալիս` իմ մի քանի ընկերներին տեսնելու: Բաթումիում իրավիճակն այդքան էլ վտանգավոր չէ և հնարավոր է դիմակով ու կարճ ժամանակով տանից դուրս գալ: Այս օրերին ես կարդում եմ գրքեր, դիտում եմ ֆիլմեր կամ սերիալներ, մասնակցում համալսարանի հեռավար դասերին, գրում դիպլոմային աշխատանքս: Ես և փոքրիկ եղբայրս ապահովում ենք նաև այս օրերի զվարճալի կողմը: Հումորային, զվարճալի, երբեմն էլ երաժշտական տեսանյութեր ենք պատրաստում միասին: Դե իսկ այս օրերի ամենահամեղ հատվածը երեկոներն են, երբ տատիկս համեղ թխվածքաբլիթներ է պատրաստում և մենք ամբողջ ընտանիքով վայելում ենք այն, զրուցում, ծիծաղում և խաղեր խաղում:

Covid-19-ից հետո մարդիկ ավելի շատ կգնահատեն միմյանց

Վրացիները մեծ հավատք ունեն: Նրանցից շատերը կարծում են` աղոթքները և հավատն առ Աստված օգնում են ուժեղ լինել ստեղծված իրավիճակում: Ես նույնպես հավատում եմ, բայց իմ կարծիքով այն, ինչ իսկապես օգնում է իմ երկրին, դա յուրաքանչյուրի քաջալերանքն է, նրանց բարությւոնը և անկեղծությունը: Իհարկե կարևոր են նաև կառավարության ռացիոնալ քայլերը: Կարծում եմ` Covid-19-ից հետո մարդիկ ավելի շատ կգնահատեն միմյանց և մենք կհասկանանք` որքան ուժեղ կարող է լինել երկիրը, եթե մարդիկ կանգնեն միմյանց կողքին և աջակցեն իրար:

Աննան Խորհուրդ է տալիս դիտել...

Stranger things, Elite, Homeland, Money heist սերիալները

Խորհուրդ է տալիս կարդալ…

Հարուկի Մուրակամի, Դոստոևսկի` «Ապուշը», Վիկտոր Հյուգո` «Թշվառները», Ջորջ Օրուել` «1984»։

Աղբյուր` Փաստինֆո