Փաստ ինֆո

Կորոնավիրուսային իրավիճակով պայմանավորված «Սպայկա» ընկերությունը մի շարք խնդիրների առաջ է կանգնել։ 

«Սպայկա»-ն բացի բեռնափոխադրումից նաև արտադրական գործընթացներ է իրականացնում, շրջանի ամենամեծ ջերմոցները «Սպայկայինն» են՝ 105 հեկտար, և այժմ միջոցառումներ են իրականացնում, որպեսզի աշխատակիցների անվտանգությունն ապահովի ու աշխատանքը հավուր պատշաճի կազմակերպվի։

«Հիմա մեզ մոտ իրավիճակն այնքանով է բարդ, որ պետք է այնպես անենք, որ աշխատակիցները գան աշխատանքի, իսկ եթե չեն կարողանում գալ, ապա նրանց փոխարինող պետք է լինի։ Աշխատանքի կազմակերպումը չափազանց բարդացել է»,-այս մասին այսօր «Փաստինֆո»-ի հետ զրույցում ասաց «Սպայկայի» զարգացման գծով տնօրեն Կարեն Բաղդասարյանը։

Անդրադառնալով բեռնափոխադրումներին վերաբերող խնդիրներին, նա նշեց, որ կորոնավիրուսի հետ կապված դժվարություններ են առաջացել Վրաստանի տարածքում, Լարսում էլ կուտակումներ են․ «Այս բոլոր խնդիրները, որոնք Վրաստանում առաջանում են, առանձին կազմակերպություներ չեն կարող լուծել, պետությունը պետք է օնլայն ռեժիմում լուծի, մեխանիզմներ մշակի ու հետևի, որ դրանք մի օր առաջ, մի րոպե շուտ իրականացվեն, իսկ թերությունների դեպքում էլ անմիջապես արձագանքի»։

Բաղդասարյանը հայտնեց, որ այս խնդիրների պատճառով «Սպայկան» արդեն իսկ 2000 տոննա ապրանք է կորցրել, որն իրենից ենթադրում է ավելի քան 2 մլն դոլարի վնաս։

«2 օր առաջ դեռ 100-ից ավելի մեքենա կար կանգնած սահմանին, դրանք հայկական կողմում արդեն իսկ 10 օրից ավելի կանգնել էին, չէին կարողանում մտնել Վրաստան։ Հիմա փոքր խմբաքանակներով այդ մեքնաներին սկսել են բաց թողնել, սակայն չկա հստակ ռեժիմ, թե որ խմբաքանակն են բաց թողնելու, քանի մեքենա են բաց թողնելու ու ինչ գրաֆիկով։ Դրա համար ոչինչ չի լինում պլանավորել, մեքենաների մի մասը ստիպած Երևանում ենք թողնում, որպեսզի չգնան հերթի մեջ սպասեն։ Հիմա բարձված մեքենաները սպասում են»,-ասաց զարգացման գծով տնօրենը։

Նա նշեց, որ շատ երկրներ հնարավոր կարանտինային ապրանքներից խուսափելու համար սահմանափակումներ են մտցնում․ «Օրինակ` Հնդկաստանից մոտավորապես 400 կոնտեյներ խնձոր հետ են տվել, որովհետև միրգը բարձվել է այն ժամանակ, երբ Իտալիայում համաճարակը տարածվել էր։ Այսինքն, Հնդկաստանը հրաժարվում է Իտալիայից ապրանք ընդունել։ Դա ազդանշան է ոլորի համար, որ ցանկացածը կարող է այս փաստի առաջ կանգնել։ Նույնը կատարվեց նաև Հայաստան-Իրան սահմանի դեպքում, երբ Իրանից Հայաստան ապրանքների մուտքն արգելափակվեց, այսինքն` ամեն երկիր հնարավոր է որոշ սահմանափակումներ մտցնի, և դա սննդի ոլորտում աշխատող ընկերությունների համար վտանգներ է պարունակում»։

Բաղդասարյանի խոսքով, «Սպայկան» դեռևս արտահանման հետ կապված խնդիր, այս մասով, չունի, ուղղակի մինչ այս Պարսկաստանից ապրանքը բերում էին, Հայաստանում մաքսազերծում, տրանզիտով Հայաստանից արտահանում Ռուսաստան, իսկ հիմա չեն կարողանում։

«Պարսկական առևտրի հատվածը կանգնել է, և, այո, այդ առումով խնդիր ունենք, բայց դա միջազգային առևտրի մասին է խոսքը, իսկ Հայաստանից դուրս գնացող ապրանքների հետ կապված, հուսամ, խնդիր չի լինի, բայց տրանզիտի կազմակերպման ու Վրաստանն անցնելու հետ կապված, ինչպես նշեցի, խնդիր ունենք»,-հայտնեց զարգացման գծով տնօրենը։

Բաղդասարյանն ընդգծեց՝ ստեղծված իրավիճակում գնագոյացման հարցում շուկայում նույնպես փոփոխություններ կլինեն։

«Հիմա դիզելի գինն ընկել է, բայց երբ մեքենաները անորոշ ժամանակով կանգնում են սահմանին, արդեն ապրանքը չի լինում ու պարապուրդի է մատնվում մեքենան, դա էլ մեխանիկորեն հանգեցնելու է տրանսպորտի գնի բարձրացման, ինչն անխուսափելի է։ Որտեղ լոգիստիկ շղթաներն ընդհատվում են, այնտեղ տրանսպորտի գինը բարձրանալու է»,-նշեց նա ու ավելացրեց, որ այսօր ամբողջ աշխարհում իրավիճակն այնպիսին է, որ ով ի վիճակի եղավ արտադրել ապրանք, ինքն է որոշելու ապրանքի գինը։

Հեղինակ՝ Սոնա Գեւորգյան

Աղբյուր` Փաստինֆո