Փաստ ինֆո

Երբ մեկ տարի առաջ, երբ կառավարությունը գյուղատնտեսության նախարարությունն օպտիմալացրեց՝ այն ներառելով էկոնոմիկայի նախարարության կազմում, հենց այն տարին էր, որ մնացած բոլոր ուղղությունների համեմատ Հայաստանի գյուղատնտեսությունը ոչ միայն չնչին աճ չարձանագրեց, այլև հետընթաց արձանագրեց:

Այն, նախորդ և ներկա իշխանությունները այս ոլորտում լավ ցուցանիշներ ունենալը բախտի բերմամբ լավ եղանակ ունենալու հետ են կապել, մինչդեռ ժամանակակից գյուղատնտեսության տարբերությունը նախորդ կամ նախանախորդ դարերի գյուղատնտեսությունից հնարավորինս այս մտայնությունից ձերբազատված լինելու մեջ է, շատ մասնագետներ են պնդում, ինչն, ըստ ամենայնի նոր իշխանությունները այսօր, ճգնաժամային իրավիճակում միայն սկսեցին կարևորել : ՈՒշագրավ է, որ Նիկոլ Փաշինյանն այս ոլորտում զարգացման ճանապարհ դուրս գալու մեկնարկային շանս է դիտարկում կորոնավիրուսի համաճարակի աշխարհասփյուռ լինելը: «Հիմա ակնհայտորեն անկման փուլում ենք և կորոնավիրուսային և ետկորոնավիրուսային շրջանում պիտի կիրառենք զարգացման այլ սցենարներ: Դրանք պիտի լինեն ավելի ամբիցիոզ:Առաջիկա հինգ տարվա ընթացքում մեր ՀՆԱ-ն պետք է կրկնապատկենք: Նախկին սցենարում նման արդյունքի հասնել հնարավոր չէր: Ճգնաժամը, չնայած ընթացիկ պրոբլեմներ է ստեղծում, բայց նաև բացում է նոր, մեծ հնարավորություններ:
Ի՞նչ է նշանակում, ի՞նչ ասել է՝ նախկին սցենարում նման արդյունքի հասնել հնարավոր չէր, հիմա հնարավոր է: Նախկին և նոր սցենարների մեջ չխորանալով, շեշտենք, որ մեր գյուղատնտեսական ապրանքները՝ լոլիկից մինչև վարունգ, կարտոֆիլ ու ձմերուկ և ոչ միայն, ինչ-որ պահից սկսած՝ այլևս մեր՝ հայկական միրգ-բանջարեղենի համն ու հոտը չունեին: Փաշինյանի նախանշած ամբիցիոզ սցենարների արդյունքում արդյո՞ք այլևս ԳՄՕ-ացված սննդամթերք չե՞նք ունենա, այսինքն, ադրբեջանական սխտոր, թուրքական՝ քաղցկեղով վարակված կամ բելոռուսական ճառագայթված կարտոֆիլ, և կամ՝ կամ Պակիստանից կասկածելի ծագման միրգ ու բանջարեղեն չե՞նք ունենա...

Ընդհանրապես, գյուղատնտեսությունը ոլորտ է, որտեղ ,,կորոնավիրուսի,, մոտիվներով սցենարներ արդեն տարիներ շարունակ են կիրառվել. մենք այդ ամենը տեսնում ենք, քանի որ մեր աչքի առաջ մեր սնունդը կորցնում է իր որակական հատկանիշները:

Գյուղատնտեսության ոլորտում ահռելի անելիք կա և ճիշտ չէր այս բնագիծը էկոնոմիկայի նախարարության մի ճյուղ որպես ներկայացնելը: Ի վերջո, եթե գերատեսչական միացումները պայմանավորված են կադրերի սղությամբ, ապա մի՞թե այսօր կադրերի հարցը լուծված է: Իհարկե՝ ոչ:

Տպավորությունն այնպիսին է, որ մեզանում բոլոր ոլորտներում իսկապես էլ սցենարներով են առաջնորդվում, այլ ոչ՝7 անգամ չափած արդյունավետ քաղաքականությամբ: Ինչևէ, հուսանք, որ երեկվա կառավարության նիստում գյուղոլորտի զարգացմանն ուղղված մոտիվները պոպուլիզմի ժանրից չեն լինի:

Հեղինակ՝ Մարինե Մինասյան

Աղբյուր` Փաստինֆո