Փաստ ինֆո

Երևանի ընդհանուր իրավասության դատարանում՝ դատավոր Արմինե Մելիքսեթյանի նախագահությամբ, մարտի 26-ին կայացել է ՀՀ երկրորդ նախագահ Ռոբերտ Քոչարյանի աջակիցներ Սարգիս Օհանջանյանի և Նարեկ Մութաֆյանի գործով հերթական դատական նիստը: Այս մասին «Փաստինֆո»-ն տեղեկացավ պաշտպան Արամ Վարդևանյանից: Դատական

նիստին դատավարության մասնակիցներից բացի այլ անձինք չեն մասնակցել՝ պայմանավորված երկրում արտակարգ դրությամբ և ԲԴԽ որոշմամբ:

Այսօրվա դատական նիստին մեկնարկել է գործի դատաքննության փուլը: Մեղադրող դատախազը հրապարակել է մեղադրական եզրակացությունը:

Հիշեցնենք, ըստ մեղադրանքի՝ Նարեկ Մութաֆյանը եւ Սարգիս Օհանջանյանը, նախապես տեղեկանալով Ռոբերտ Քոչարյանի և մյուսների վերաբերյալ քրեական գործը քննող Երևան քաղաքի ընդհանուր իրավասության դատարանի Շենգավիթ նստավայրի դատավոր Աննա Դանիբեկյանի ՀՀ արդարադատության ակադեմիայում գտնվելու և դասընթացների մասնակցելու մասին, 2019թ. սեպտեմբերի 27-ին` ժամը 16:50-ի սահմաններում, գնացել են արդարադատության ակադեմիա։ Նախաքննության տվյալներով՝ նրանք սպասել են ակադեմիայի բակում, որպեսզի դասընթացների ավարտից հետո հանդիպեն Ա.Դանիբեկյանին, տեսաձայնագրեն և այն ուղիղ կապի միջոցով «փորձենք օգնել ֆեմիդային» վերտառությամբ հոդվածի տեսքով տարածեն համացանցում, սակայն Ա.Դանիբեկյանը խույս տալով վերջիններիցս, դուրս է եկել ակադեմիայի հետևի մուտքից ու հեռացել:

Այնուհետև, նույն օրը, ժամը 20:30-ի սահմաններում, Մութաֆյանը Սարգիս Գառնիկի Օհանջանյանի հետ Երևան քաղաքի Արշակունյաց պողոտայի 28 հասցեում գտնվող Կոմիտասի անվան պանթեոնի հարակից այգում հետապնդել է իր բնակության վայր գնացող Աննա Դանիբեկյանին և վերջինիս պատիվն ու արժանապատվությունը նվաստացնելով` հարցրել է նրան, թե արդյոք, «վնգստացող» դատավորների շարքին է պատկանում` կապված Ռ.Քոչարյանի նկատմամբ ընտրված խափանման միջոցի որոշման հետ, որից հետո առաջարկել է նրան ցույց տալ գլխի հատվածը` պարզելու համար, թե փայտի հարվածների հետքեր կան նրա գլխին, թե` ոչ, որից հետո փորձել է տեսանկարահանել այդ հատվածը և այդ ամենն իր ու Ս.Օհանջանյանի կողմից տեսաձայնագրելու և ուղիղ կապի միջոցով համացանցում տարածելու ձևով ճնշում գործադրելով` միջամտել է դատավոր Աննա Դանիբեկյանի կողմից հետագայում կայացվելիք որոշումների արդարացի ընդունման վրա: Նարեկ Մութաֆյանին եւ Սարգիս Օհանջանյանին մեղադրանք է առաջադրվել ՀՀ քրեական օրենսգրքի 332-րդ հոդվածի 1-ին մասով՝արդարադատության իրականացմանը խոչընդոտելու համար։ Նարեկ Մութաֆյանը և Սարգիս Օհանջանյանը հայտարարել են, որ մեղադրանքում իրենց մեղավոր չեն ճանաչում:

Փաստաբան Արամ Վարդևանյանն այսօրվա դատական նիստում հանդես է եկել հայտարարությամբ՝ նշելով, որ նախաքննության ընթացքում որոշ հանգամանքներ չեն արձանագրվել՝ դրանով իսկ կասկածի տակ դնելով նախաքննության օբյեկտիվությունը, մասնավորապես՝ նյութերում առկա չէ տեսանյութի ամբողջական տարբերակը:

Ըստ դատարանի կողմից սահմանված հաջորդականության՝ ապացույցների հետազոտումը կիրականացվի հետևյալ հաջորդականությամբ՝ կհետազոտվեն գործում առկա փաստաթղթերը, հետո կհարցաքննվեն տուժողներն ու վկան, ապա՝ ամբաստանյալները: Նշենք, որ այս դատական նիստին բացակայել է գործով տուժող ճանաչված Աննա Դանիբեկյանը: Վարդևանյանը «Փաստինֆո»-ի հետ զրույցում ասաց, որ ըստ դատախազի` տուժող ճանաչված դատավորի ներկայությունը՝ որպես հարցաքննվողի, պարտադիր չէ՝ հիշատակելով ՄԻԵԴ-ի որոշում:

«Ես վստահաբար պնդում եմ, որ նման բան գոյություն չունի և շատ հետաքրքիր կլիներ լսել դատախազի կողմից կոնկրետ ՄԻԵԴ նախադեպային իրավունքը և այդ որտեղ է գրված, որ դատավորը, նախաքննության ընթացքում մեղադրանքի հիմքի ամենակարևոր ցուցմունք տված լինելու պայմաններում, դատաքննությանը չներկայանա, երբ օրենքի առջև բոլորն են հավասար »,- նշեց Վարդևանյանը՝ հավելելով, որ ապացույցն ապացույց ճանաչելու համար պետք է հենց դատարանում ներկայացնել՝ սուտ ցուցմունքի վտանգի տակ, ինչն էլ հենց քրեական պատասխանատվության հիմք է:

Վարդևանյանի խոսքով՝ երբ դատախազը խոսում է դատավորի նկատմամբ ավելի զուսպ և ավելի գաղտնիության ռեժիմ պահպանելու մասին, հետաքրքիր է դատախազը հայտնում է իր մասնավոր կարծիքը, թե դատախազության: «Որովհետև դատախազության ընդհանուր կարծիքը կարծես այլ է: Մենք ականատես ենք եղել դատավոր Դավիթ Գրիգորյանի դեպքին, երբ դատավորի հետ կապված ինչպիսի իրավիճակ էր տիրում, մենք ականատես ենք եղել ՀՔԾ կողմից՝ դատավոր Ալեքսանդր Ազարյանի կայացրած դատական ակտերին գնահատական տալուն, որն ընդհանրապես իրավունքի հետ կապ չունի և իհարկե Հրայր Թովմասյանի դեպքն են տեսել: Կարծես թե այդ բոլոր դեպքերում չէր հիշատակվում դատավորների նկատմամբ առավել զգուշության և զգոնության հանգամանքը»,- նշեց Վարդևանյանը:

Փաստաբանը գտնում է, որ Աննա Դանիբեկյանը պետք է ներկայանա դատական նիստերին և դա նրա պարտականությունն է:

«Դատարանը որոշեց ծանուցագիր ուղարկել Աննա Դանիբեկյանին՝ հաջորդ դատական նիստի համար, որը կկայանա ապրիլի 29-ին՝ ժամը 16;00-ին: Սա արդեն երրորդ դատական նիստն է, որ Աննա Դանիբեկյանը չի ներկայանում, ոչ մի տեղեկատվություն չի հայտնում և այս քրեական գործը դատարանի նկատմամբ անհարգալից վերաբերմունքի մասին է»,- ասաց Վարդևանյանը:

Հեղինակ՝ Իզաբել Սահակյան

Աղբյուր` Փաստինֆո