Փաստ ինֆո

«Ռուսաստանի համար երկրորդական չէ, թե ով է Արցախի նախագահը, Ռուսաստանը բնավ մտադրություն չունի կորոնավիրուսի հետ կապված խնդիրներով մի կողմ քաշվել եւ այլեւս ուշադրություն չդարձնել Հարավային Կովկասում տեղի ունեցող իրադարձությունների վրա»,-«Փաստինֆո»-ի հետ զրույցում նման կարծիք հայտնեց քաղտեխնոլոգ Արմեն Բադալյանը՝ անդրադառնալով Տելեգրամի «Ереванская телебашня» ալիքը հրապարակած փաստաթղթին, որը վկայում է՝ Արցախի Հանրապետության նախագահի թեկնածու Մասիս Մայիլյանի մուտքը Ռուսաստան 5 տարով արգելափակված է:

Քաղտեխնոլոգը սա ոչ պատահական, այլ կազմակերպված արտահոսք է համարում՝ հիշեցնելով, որ առաջին արտահոսքը այս մասին եղավ տեղեկության տեսքով, ինչը նշանակում է, որ Ռուսաստանը մի քանի անգամ ցույց է տվել, որ բացասաբար է վերաբերվում Մասիս Մայիլյանի թեկնածությանը:

«Որոշ ժամանակ առաջ նշվեց, որ դեպի ՌԴ Մասիս Մայիլյանի եւ Սամվել Բաբայանի մուտքը արգելափակված է, ընդամենը պետք է Մասի Մայիլյանը եւ Սամվել Բաբայանը հարցում ուղարկեին ՌԴ սահմանապահ ծառայություն ու հերքեին այդ տեղեկությունը,բայց իրենք հարցում չարեցին, ինչը նշանակում է, որ նրանք անուղղակի աղբյուրներից գիտեն, որ փակ է, իսկ այն որ դա կրկին շրջանառության մեջ է դրվում, նշանակում է՝ ՌԴ-ի վերաբերմունք կոնկրետ նախագահի այդ թեկնածուի նկատմամբ բացասական է»,-ասաց քաղտեխնոլոգը:

Հիշեցնենք, որ Տելեգրամի «Ереванская телебашня» ալիքը հրապարակել էր մի փաստաթուղթ, որը վկայում է Արցախի Հանրապետության նախագահի թեկնածու Մասիս Մայիլյանի՝ ՌԴ մուտքի արգելքի սահմանումը։ Փաստաթղթից պարզ է դառնում, որ Մասիս Մայիլյանի մուտքը ՌԴ արգելված է 2020 թվականի մարտի 11-ից, և արգելափակված է մնալու 5 տարի ժամկետով՝ մինչև 2025 թվականի մարտի 11-ը։

Արգելանքի որոշումը կայացվել է Ռուսաստանի անվտանգության դաշնային ծառայությունը (ФСБ), իսկ որպես պատճառ նշվել է, որ Մասիս Մայիլյանը ներկայացնում է սպառնալիք Ռուսաստանի ազգային անվտանգությանը։ Աղբյուրը նաև ուշադրության էր հրավիրում այն փաստին, որ որոշման մեջ նշված անձնագրի սերիան դիվանագիտական է։

Արմեն Բադալյանի խոսքով, Արցախի նախագահի Հանրապետության նախագահի ընտրությունը ճանաչված հանրապետության նախագահի ընտրություն չէ, որը գտնվում է հետաքրքրություն չներկայացնող տարածաշրջանում: «ԼՂ-ը կարեւորագույն տարածաշրջանում է գտնվում եւ հանդիսանում է մի մեծ աշխարհաքաղաքական փազլի տեդալներից մեկը: Ղարաբաղը երկար սահման ունի Իրանի հետ, Ղարաբաղը մի գործոն է, որը Հայաստանի, Ադրբեջանի եւ Հարավային Կովկասի համար մեծ նշանակություն ունի եւ յուրաքանչյուր աշխարհաքաղաքական կենտրոն Ղարաբաղի հարցը դիտարկում է որպես իր արտաքին քաղաքականության մեջ կարեւորություն ունեցող հարց»,-շեշտում է Արմեն Բադալյանը՝ շարունակելով, որ
աշխարհաքաղաքական կենտրոնների համար ոչ միայն երկրորդական չէ, այլեւ խիստ առանցքային է, թե ով է լինելու այդ տարածաշրջանի ղեկավարը, որովհետեւ կա նաեւ Արցախի նախագահը նաեւ ռազմաքաղաքական առաջնորդ է:

«Ղարաբաղը նախագահական կառավարման համակարգ ունեցող երկիր է եւ նախագահը գերագույն գլխավոր հրամանատար լինելուց բացի նաեւ փաստացի ռազմաճակատի հրամանատար է եւ ով էլ դառնա նախագահ, կարող է պաշտպանության նախարարին ու զինվորական ղեկավարությանը փոխելով, դառնալ ռամաքաղաքական ղեկավար իսկ դրանից շատ բան է կախված»,-ընդգծում է Արմեն Բադալյանը:

Քաղտեխնոլոգը պատահական չի համարում, որ վերոհիշյալ փաստաթղթի արտահոսքը հենց այս փուլում տեղի ունեցավ: Արցախում սպասվող ընտրություններին ընդամենը 5 օր է մնացել, իսկ այդ ընթացքում, ըստ Բադալյանի, տեղեկությունը բավականին արագ տարածում կգտնի Արցախում եւ համապատասխան ազդեցություն կունենա:

«Բնականաբար, դա կարող է ազդել թեկնածուների ստանալիք ձայների վրա:
Ավելին, կարող է անգամ ընտրությունները հետաձգելու հարց լինել, որը քիչ հավանական է, բայց եթե ընտրությունները չհետաձգվեն, արդյունքների վրա ազդելու դա միանշանակ է»,-եզրափակեց Արմեն Բադալյանը:

Աղբյուր` Փաստինֆո