Փաստ ինֆո

Մշակվել է օժանդակության միջոցառում, որի միջոցով փոքր ու միջին ձեռնարկությունները, որոնք 2019թ ունեցել են 24-500 մլն դրամի շրջանառություն, կարող են դիմել՝ վարկ ստանալու նպատակով: Այս մասին ասուլիսին ասել է ՀՀ էկոնոմիկայի փոխնախարար Նաիրա Մարգարյանը:

Փոխնախարարը թվարկեց այն ոլորտները, որոնք ներառված են ծրագրում՝ մշակող արդյունաբերություն, կացություն-հանրային սնունդ, զբոսաշրջային ծառայություններ, առողջապահական ծառայություններ: Նրա խոսքով՝ այս ոլորտներն ամենախոցելիներն են:

Բացի այդ՝ գոյություն ունի նաև պահանջ, որ տվյալ ՓՄՁ-ն, որը դիմում է աջակցության ծրագրին, պետք է ունենա լավ վարկային պատմություն և ներկայացնի երաշխավորություն: Ընդ որում՝ վարկի առավելագույն չափը 50 մլն դրամ է, բայց ոչ ավել, քան տնտեսվարող սուբյեկտի 2019թ. շրջանառության 10 տոկոսը և այդ գումարը կարող է օգտագործվել աշխատավարձի վճարման՝ ոչ ավել քան 3 ամիս, հումքի գնման և ներմուծման համար՝ պայմանով, որ այն պետք է օգտագործվի ՀՀ-ում, հարկեր և տուրքերի պարտադիր վճարումներ իրականացնելու համար, հանրային ծառայությունների վճարումների և վարձակալության համար:

Փոխնախարարի խոսքով՝ 36 ամսով տրամադրվող վարկերի առաջին 24 ամիսը լինելու է անտոկոս, 25-36-րդ ամսվա համար վարկերը տրամադրվում են՝ 22 տոկոս տոկոսադրույքով: Մարգարյանը նշեց, որ այս պահին դեռևս չի քննարկվում հարկադիր արձակուրդներ տրամադրելու հարցը:

Աղբյուր` Փաստինֆո