Փաստ ինֆո

ԱԺ պետաիրավական հարցերի մշտական հանձնաժողովն այսօրվա նիստում քննարկել է Հայաստանի Հանրապետության Կառավարության 2019 թվականի փետրվարի 8-ի N 65-Ա որոշմամբ հավանության արժանացած` Հայաստանի Հանրապետության Կառավարության ծրագրի 2019 թվականի կատարման ընթացքի եւ արդյունքների մասին զեկույցը։

Հիմնական զեկուցող Արդարադատության նախարար Ռուստամ Բադասյանը ներկայացրել է ծրագրերի կատարողականը և կոռուպցիաի կանխարգելման հարցում արձանագրված հաջողությունները։

«2019թ-ին ընդունված օրենսդրական փաթեթի արդյունքում ձևավորվել է կոռուպցիայի կանխարգելման հանձնաժողովը, որպես ինստիտուցիոնալ հակակոռուպցիոն կանխարգելման մարմին, արդեն լրամշակման փուլում է հակակոռուպցիոն կոմիտեի մասին օրենքը, որը շուտով կուղարկվի վարչապետի աշխատակազմ, Կառավարության վերջին նիստում քննարկվեց հողամասի հատկացման հարցը, որտեղ նախատեսվում է բացահայտման ֆունկցիա ունեցող հակակոռուպցիոն մարմնի գործունեության համար շենքային պայմաններ ստեղծել։ Կոմպոնենտներից մյուսը գլխավոր դատախազության կազմում հատուկ մասնագիտացված հակակոռուպցիոն ստորաբաժանման ձևավորումն է, որը պետք է նախաքննության օրինականության նկատմամբ հսկողություն իրականացնի։ Հակակոռուպցիոն դատարանն էլ ինստիտուցիոնալ համակարգի վերջին բաղկացուցիչն է․․․»,-ասաց Բադասյանը։

Նա նշեց, որ Թրանսփարենսի ինթերնեշնլ հակակոռուպցիոն կենտրոնի 2019թ-ի զեկույցից պարզ է դառնում, որ նախորդ տարվա համեմատ Հայաստանն իր դիրքերը բարելավել է միանգամից 28 հորիզոնականով և, այսպիսով` Հայաստանի ամբողջ պատմության մեջ ռեկորդային ցուցանիշ է արձանագրվել։
ԱԺ «Լուսավոր Հայաստան»> խմբակցության պատգամավոր Տարոն Սիմոնյանը հետաքրքրվեց քրեակատարողական հիմնարկների զբաղվածության հարցով՝ ինչ ծրագրեր են իրականացվել, ապա նշեց, որ մի քանի համայնքներում հանցավորության աճ է գրանցվել, սակայն զուգահեռաբար նաև հանցավորության գրանցման նվազում կա։ Նախարարը սա կապեց հանցագործության դեպքերը պատշաճ գրանցելու հետ ու նշեց, որ միգուցե դրա արդյունքում են թվային տարբերություններ եղել։

«Հիշում եք, որ համաներման արդյունքում քրեակատարողական հիմնարկներից բավականին մեծ թվով մարդիկ ազատության մեջ հայտնվեցին և այդպիսով կրկին հանցագործության դեպքեր արձանագրվեցին։ Հնարավոր է այդ կարճ ժամանակահատվածում եղածը վիճակագրության վրա ազդած լինի»,-ասաց Բադասյանը։

Անդրադառնալով կալանավորների զբաղվածության հարցին, նա ասաց, որ սա վերասոցիալականության ճանապարհին շարունակում է մնալ հիմնական խոչընդոտներից մեկը, եթե ոչ ամենահիմնականը․ «Այն պահին, երբ ես եմ նախարար նշանակվել, աջակցություն դատապարտյալին հիմնադրամը սակավ թվով դատապարտյալների է ներգրաված եղել աշխատանքի, այդ մասով բավական տխուր էր պատկերը և շարունակում է տխուր մնալ»։

Նա հայտնեց, որ առաջիկայում խոհարարական դասընթացների միջոցով նախատեսվում է 20 դատապարտյալի աշխատանքով ապահովել։

Աղբյուր` Փաստինֆո