Փաստ ինֆո

Հայաստանի գործատուների միության և Ռեստորանների հայկական միության ՀՀ կառավարությանն ուղղված առաջարկները համընկնում են: «Փաստինֆո»-ի հետ զրույցում Գործատուների միության նախագահ Գագիկ Մակարյանը, անդրադառնալով ռեստորանների միության շրջհարկի և եկամտահարկի սառեցման հետ կապված առաջարկին, նկատեց ինքը ևս կառավարությանը դիմել է առաջարկներով, այդ թվում  հարկային արձակուրդի տրամադրման կամ հարկերի վճարման ուշացումների համար տույժ-տուգանք չհաշվարկելու հարցով:

«Առաջարկել էի բազմաթիվ ոլորտների, այդ թվում նաև սպասարկման և տուրիզմի ոլորտների ՓՄՁ-ներին տրամադրել դրամաշնորհ 4000 դոլարից մինչև 25000 դոլար, որ կարողանան լավացնել ներքին ռեսուրսները: Պետությունը դրամաշնորհի մի էլեմենտը կիրառեց, դա 5-րդ ծրագիրն է: Դա էլ է լավ մոտիվացիա»,-ասաց Գագիկ Մակարյանը նկատելով, որ աջակցության մյուս ծրագրերի միջոցով պետությունը փորձել է լուծել խնդիրը ոչ թե դրամաշնորհ, այլ վերադարձելի գումար տալով:

Գագիկ Մակարյանի առաջարկներից մեկն էլ այն էր, որ պետությունը Հանրային ծառայությունների հանձնաժողովի միջոցով կարգավորի բիզնեսի էներգակիրների վճարումների հարցը: Տնտեսագետը նկատեց այն կազմակերպությունները, որոնք վարկ չեն վերցնելու, չեն կարողանալու մուծել էներգակիրների համար, ինչի հետևանքով կանջատվի նրանց հոսանքը, գազը, ջուրը: Արդյունքում տնտեսվարող սուբյեկտը կդադարի ընդհանրապես գործել և կհայտնվի սնանկացման վտանգի առջև. «Առաջարկել էի պետությունը միջին ամսական կտրվածքով մուծեր բիզնեսի էներգակիրների համար: Այսինքն «Վեոլիա»-ին, «Գազպրոմ Արմենիա»-ին, «ՀՔՑ»-ին վճարեր բիզնեսի փոխարեն, բայց երբ ձեռնարկությունները հետ կվճարեին այդ գումարը, այս 3 ընկերությունները հետ կվերադարձնեին դա պետությանը: Այսինքն պետությունը ոչ թե գործ կունենար հազարավոր ՓՄՁ-ների հետ, այլ այդ 3 ընկերությունների հետ»,-ասաց Գագիկ Մակարյանը:

Վերջինս ընդգծեց նմանատիպ մոդելները կարող էին արդյունավետ լինել, սակայն կառավարությունն առաջարկները չի ընդունել: Այնուամենայնիվ տնտեսագետին հուսադրում է վարչապետի խոսքն այն մասին, որ գործելու ընթացքում գործիքակազմը կլավացնեն: Գագիկ Մակարյանը հույս հայտնեց, որ ապրիլի 1-ից մինչև 15-ն ընկած ժամանակահատվածում կարող է անալիզ անեն, տեսնեն, թե քանի ընկերություն վերցրեց, քանիսն են դիմել և բանկերն ինչքան կարողություն ունեն սպասարկելու. «Օրինակ հնարավոր է բանկերն ամիսը 100 ընկերությունից ավել չկարողանան սպասարկել: Հիմա 20 բանկ ու ֆինանսական կազմակերպություններ ենթադրենք 2500 ընկերության տվեցին, բա մնացածը: Մենք ունենք 80 հազար ՓՄՁ և ԱՁ: Ստացվում է, որ երեք ամսում կարող ենք լավագույն դեպքում 10 տոկոսին սպասարկենք: Սա, իհարկե, տեսականորեն, իրականում պետք է տեսնենք որքանով ենք կարողանում սպասարկել»,-ասաց Գագիկ Մակարյանը հավելելով, որ պետությունը պետք է տեսնի այդ գործիքակազմն այդքան էլ կատարյալ չէ և այն պետք է ավելի լավացնի:

Աղբյուր` Փաստինֆո