Փաստ ինֆո

Անգամ այս իրավիճակում Նիկոլ Փաշինյանի իշխանությունը որդեգրել է ժուլիկությունների և մանիպուլյացիաների ստրատեգիան, որի նպատակը ոչ թե վիրուսի և վիրուսից ավելի ահավոր ու վտանգավոր տնտեսական հետևանքների մեղմումն է, այլ՝ այդ հետևանքների պատասխանատվությունն ուրիշների վրա բարդելու և իրենց թիթեռնիկ ներկայացնելու ռազմավարությունը: Այս մասին հրավիրված ասուլիսին ասաց «Ադեկվադ» միաբանության համահիմնադիր Կոնստանտին Տեր-Նակալյանը:

Վերջինիս խոսքով՝ ժամանակավրեպ քայլերը չեն տալիս ցանկալի արդյունքը, միևնույն ժամանակ օրվա հրամայական հանդիսացող, կենսական նշանակություն ունեցող քայլեր չեն արվում:

Վերջինս նշեց, որ ամեն ինչ գնում է ժան բեմադրությունների սցենարով և չեն տրվում կարևորագույն կարգավորումներ, օրինակ՝ արտակարգ դրությունը, որը պետք է հայտարարվեր առնվազն մարտի 1-ին, երբ կար առաջին հիվանդը, այլ ոչ թե՝ մարտի 16-ին:

«Երբ դեռ գրանցված հիվանդության դեպքեր չկային, մարդիկ Նիկոլ Փաշինյանին և Արսեն Թորոսյանին ասում էին՝ սա մեծ ռիսկեր է պարունակում, եկեք այդ մի քանի հարյուր հոգուն, ովքեր գալիս են Իտալիայից, Չինաստանից, Իրանից, կոշտ ինքնամեկսուցաման կարանտինի մեջ դրեք, իրենք սկսում էին պաթոսով բացատրել՝ մեր քաղաքացիներն են, ինչպես կարելի է այդպես վարվել»,- ասաց նա:

Վերջինս նշեց, որ ժողովուրդը պետք է սնվի և, երբ մարդկանց ուղարկում են տներով և ասում՝ չես կարող աշխատել, դրանից մարդու ֆիզիոլոգիական պահանջները չեն զրոյանալու և ֆիզիոլոգիական պահանջները չեն սպասելու մինչև արտակարգ դրությունն ավարտվի և մարդը չսովածանա: Տեր-Նակալյանի խոսքով՝ պետք է ձեռնարկվեն օպտիմալ լուծումներ, որպեսզի մարդն էլեմենտար քաղցի խնդիր չունենա, մինչդեռ՝ երբ այդ խնդիրը բարձրաձայնվում է խորհրդարանում, տեսնում ենք, որ Նիկոլ Փաշինյանն ասում է՝ Հայաստանում օրավարձով ապրող մարդ չկա, այսինքն՝ չկա մարդ, չկա խնդիր:

Աղբյուր` Փաստինֆո