Փաստ ինֆո

Աշխարհում նոր տիպի կորոնավիրուսի տարածման տեմպերը, ձևը և ընթացքը ակնհայտ է դարձնում, որ կա նոր իրողություն և այդ պարագայում պետք է որոշակի բևեռացումներ ունենանք ռեսուրսների օգտագործման հետ կապված: Կառավարության նիստի ժամանակ ասաց ՀՀ փոխվարչապետ Մհեր Գրիգորյանը ներկայացնելով հակաճգնաժամային փաթեթներից մեկը:

Փոխվարչապետը մանրամասնեց որ ուղղություններով կլինեն բևեռացումները. «Սպառման դեֆորմացման պարագայում նաև համակարգում կա որոշակի լիկվիդայնության անկում և ենթադրվում է, որ մենք պետք է ունենանք գործողությունների և միջոցառումների շարք, որով այդ խնդիրը չեզոքացնենք: Երկրորդ ուղղությունը, որի շուրջ պետք է մոբիլիզացնենք մեր ռեսուրսները դա կորոնավիրուսի հետևանքով աշխատանք կորցրած անձանց խմբերն են, որոնց պետք է թիրախավորենք և օժանդակենք: Երրորդ ուղղությունը սոցիալապես անապահով և խոցելի խմբերի սոցիալական անվտանգության ապահովումն է: Մենք պետք է ունենանք միջոցառումներ, որոնք այդ խնդիրը կկարգավորեն»,-նշեց Մհեր Գրիգորյանը:

Վերջինս նկատեց այսօր ունենք առողջապահական համակարգի վերազինման խնդիր, ինչի ուղղությամբ ևս պետք է միջոցառումներ իրականացվեն: Ինչպես նաև ելնելով իրավիճակից` պետական պահուստների կառավարման արդյունավետ համակարգի ձևավորումն է կարևոր: Մհեր Գրիգորյանի խոսքով համապատասխանաբար պետք է ունենանք նոր ֆինանսական մոդել, ճշգրտենք անելիքները, ծախսերը և ներգրավվելիք միջոցները:

ՀՀ վարչապետ Նիկոլ Փաշինյանն էլ հավելեց, թե ինչ են ուզում անել այս ծրագրով. «Ուզում ենք ոչ միայն աջակցել մեր տնտեսության մրցունակ հատվածին և աջակցել սոցիալական առաջին հարվածները ստացած մեր խավերին, այլև շատ կարևոր է , որ այս փաթեթի խորքային նպատակը մեր տնտեսությանը, հանրությանը, մեր քաղաքացիներին ետկորոնավիրուսային ժամանակաշրջանում մրցունակ տնտեսություն և մրցունակ գործունեություն կառուցելու նախապատրաստելը և տրամադրելն է: Այս օրակարգը զարգացման ոչ մի սցենարի պարագայում չպետք է մոռանանք: Մենք ավանդական գոյատևման տրամաբանությունից պետք է տեղափոխվենք զարգացման, ուժեղացման, մեր երկրի մրցունակության բարձրացման տրամաբանություն և այս օրակարգը չպետք է կորցնենք նույնիսկ ամենաօրհասական պահերին»,-ընդգծեց վարչապետը:

Աղբյուր` Փաստինֆո