Փաստ ինֆո

Այսօր հիվանդանոցներում կան պացիենտներ, որոնք բուժում չեն ստանում: Նրանց մոտ ախտորոշված է կորոնավիրուս, բայց նրանք բուժում չեն ստանում և գործառնական իմաստով նրանց հիվանդանոցում գտնվելն արդարացված չէ: Կառավարության նիստի ժամանակ այս մասին ասաց ՀՀ վարչապետ Նիկոլ Փաշինյանը:

Վերջինս հավելեց, որ այսօր առավոտյան Առողջապահության նախարար Արսեն Թորոսյանի և ՀՀ փոխվարչապետ, պարետ Տիգրան Ավինյանի հետ քննարկում են ունեցել և որոշել, որ թեթև դեպքերին կտեղափոխեն հյուրանոցներ. «Կփորձենք աշխատել հյուրանոցների հետ, որպեսզի մեր այդ հայրենակիցներին տեղավորենք հյուրանոցներում ապահովելով սնունդը և մյուս կարիքները: Կարծում եմ պետք է այս քաղաքականությունը շարունակենք և բանակցենք հյուրանոցների հետ: Սա օգտակար է նաև այն հյուրանոցների համար, որոնք ըստ էության իրավիճակով պայմանավորված դատարկ են: Իհարկե որոշակի բարդույթներ կլինեն, որ հյուրանոցները կվախենան իրենց բրենդի հետագա մրցունակության հետ կապված»,-ասաց Նիկոլ Փաշինյանը ընդգծելով, որ կորոնավիրուսից հետո այդ հյուրանոցների սենյակների հետ որևէ վատ բան չի պատահի, առավել ևս եթե պարբերաբար ախտահանվեն:

Առողջապահության նախարար Արսեն Թորոսյանն էլ ընդգծեց այժմ ցուցումներն արդեն անում է: Նախարարն ասաց, որ թե' ստանդարտ ախտահանումը, թե յուրաքանչյուր կոնկրետ դեպքից հետո արվող հատուկ ախտահանումը կլուծի խնդիրը: Արսեն Թորոսյանի կարծիքով վարչապետի առաջարկը տեղին է. «Նման միջազգային փորձ էլ ունենք: Նախորդ շաբաթ խոսել եմ Իսրայելում պատասխանատուների հետ, նրանք արդեն 1000 թեթև պացիենտ պահում են իրենց հյուրանոցներում և չեմ կարծում, որ որևէ բրենդի հարց կարող է առաջանալ»,-հավելեց Արսեն Թորոսյանը:

Վարչապետն էլ նշեց, որ հյուրանոցների հետ կբանակցեն, որոշակի գին կպայմանավորվեն, ինչը կնպաստի այդ ենթակառուցվածքի գործունեությանը:

Աղբյուր` Փաստինֆո