Փաստ ինֆո

Փորձել ենք գյուղատնտեսության ոլորտում ընդգրկել ամբողջական շղթան սկսած փոքր ֆերմերներից մինչև վերամշակողներ և նաև արտահանողներ: Այս մասին մամուլի ասուլիսի ժամանակ ասաց ՀՀ էկոնոմիկայի փոխնախարար Արման Խոջոյանը:

Վերջինս ներկայացրեց այսօր կառավարության նիստում հավանության արժանացած գյուղատնտեսության ոլորտին ուղղված աջակցության ծրագիրը:

Փոխնախարարը նշեց առաջին գործիքակազմը վերաբերում է կարողությունների զարգացմանը և արդիական տեխնոլոգիաների ներդրման գործունեության արդյունավետության բարձրացմանը. «Այն բոլոր գործիքները, որոնք մշակել ենք նաև գործող ծրագրեր են, որոնք ոլորտի զարգացման համար են մշակվել, որոշները ինչ-որ չափով վերափոխվել են: Մնացած բոլորի մասով սուբսիդավորումը կազմել է 100 տոկոս, այսինքն` գյուղացու համար սահմանվելու են 0 տոկոս տոկոսադրույքներ»,-ասաց փոխնախարարը:

Նրա խոսքով առաջին փաթեթը վերաբերվում է միկրովարկերին: Այսինքն 0-ից մինչև 1 մլն դրամանոց վարկերը մարդիկ կարող են վերցնել 0 տոկոս տոկոսադրույքով. «Եթե բանկը համարի, որ տվյալ ֆերմերը կարող է օգտվել այդ վարկատեսակից, ապա արտոնյալ ժամկետ է սահմանվում մինչև 9 ամիս, և ֆերմերը կարող է այդ գումարը վերցնել, ներդնել իր տնային տնտեսությունում, իրականացնել հողի մշակման աշխատանքները և 9 ամիս հետո, երբ բերքը կարող է արդեն վաճառած լինել և գումար ունենալ, նոր սկսում է վարկի մարումը: Հետևաբար 9 ամիս արտոնյալ ժամկետ է սահմանվել մայր գումարի համար»,-ասաց էկոնոմիկայի փոխնախարարը:

Կա առավել նպատակային վարկային տեսակ` 3-ից մինչև 15 մլն դրամ, որը մինչև հինգ տարի ժամկետով է տրամադրվում, իսկ արտոնյալ ժամկետը մինչև 12 ամիս. «Սա մի քիչ ավելի մեծ գործունեություն ծավալելու նպատակով է: Մենք առանձնացրել ենք նաև ավելի թիրախային այն ճյուղերը, որոնք մեր կարծիքով առավել շահութաբեր և արդյունավետ ուղղություններ են: Դրանք են օրինակ ինտենսիվ այգիների հիմնումը, ջերմոցաշինությունը, խելացի անասնաշենքերը»,-հավելեց Արման Խոջոյանը:

Աղբյուր` Փաստինֆո