Փաստ ինֆո

Բյուջեի մասով լավ լուր ունենք: Կառավարության այսօրվա նիստում այս մասին հայտարարեց ՀՀ վարչապետ Նիկոլ Փաշինյանը;

«Մենք վստահ ենք, որ առաջին եռամսյակի հարկային եկամուտները կգերակատարենք մոտ 5 միլիարդ դրամով: Այս առումով բոլորիս ուշադրությունն ուզում եմ հրավիրել հարկային կարգապահության կարևորությանը: Այսօր շատ սոցիալական խնդիրների մասին են խոսում, տնտեսական աջակցության խնդիրների մասին են խոսում: Այդ խնդիրները լուծելու համար կառավարությունը պետք է ունենա եկամուտները և դա պետք է ապահովեն հարկային համակարգի միջոցով: Շատ է ասվում, որ մարդիկ չեն աշխատում, իրենցից հարկ եք ուզում: Չաշխատող, եկամուտների բացակայության, շրջանառության բացակայության, շահույթի բացակայության պայմաններում հարկ ուզել հնարավոր չէ: Հարկ ուզում են միայն այն պարագայում, երբ կա ձևավորված հարկային պարտավորություն»,-ասաց Նիկոլ Փաշինյանը:

Վարչապետը, դիմելով ՊԵԿ նախագահ Դավիթ Անանյանին, ասաց, որ մանրածախ առևտրի ծավալների աճին զուգահեռ կրկին ազդակներ են ստացվում, որ լայնորեն սկսվել է կիրառվել ՀԴՄ կտրոն չտրամադրելու պրակտիկան համարելով, որ դա ճգնաժամային իրավիճակ է. «Այո ճգնաժամային իրավիճակ է և պետք է ավելի մեծ ուշադրություն դարձվի: Ես ակնկալում եմ, որ ՊԵԿ-ը շատ ավելի կխստացնի միջոցառումները, որովհետև շատ ձեռնարկություններ չեն աշխատում, այս պրոցեսի պոտենցիալ հասցեատերերը շատ ավելի քիչ, և ես ակնկալում եմ, որ ՊԵԿ-ը հայտնաբերի և խստագույնս պատժի ՀԴՄ կտրոն չխփող ամեն դեպք, որովհետև որևէ արդարացում չկա»,-ասաց վարչապետը ընդգծելով, որ ՊԵԿ-ը պետք է կրկնակի խիստ լինի հարկերից խուսափելու բոլոր երևույթների նկատմամբ:

ՊԵԿ նախագահ Դավիթ Անանյանն ասաց, որ այդպես էլ ընկալել են թե' աշխատանքային ամենօրյա գործառույթների իրականացումը, թե' այսօր այն մարտահրավերը, որը նետված է ՊԵԿ-ին. «ՊԵԿ-ն աշխատում է ամբողջ ծավալով, բոլոր գործառույթներն իրականացվում են: Ձեր նշած հսկողական գործառույթները իրականացնող հիմնականում երկու վարչություններն ամբողջ ծավալով իրականացնում են իրենց պարտականությունները»,-ասաց Դավիթ Անանյանը:

Աղբյուր` Փաստինֆո