Փաստ ինֆո

«Կառավարությունը հապաղում է վճռական քայլերից, փոխանակ վճռական քայլեր ձեռնարկի եւ կանխի վարակը, կառավարությունը հետեւում է վարակին, այսինքն, փորձում են վերացնել հետեւանքները»,-«Փաստինֆո»-ի հետ զրույցում ասաց ՀՅԴ ԳՄ անդամ Արթուր Խաչատրյանը՝ անդրադառնալով կորոնավիրուսի հետեւանքով երկրում ստեղծված սոցիալ-տնտեսական իրավիճակին ու այդ ուղղությամբ կառավարության ձեռնարկած քայլերին:

«Մենք դեռ երկուշաբթի օրը համապարփակ, մեծ փաթեթ ներկայացրեցինք կառավարությանը՝ նշելով այն քայլերը, թե ինչ պետք է անել, որպեսզի համավարակը վերանա: Մեր առաջարկած քայլերի մեծամասնությունը կառավարությունը մաս-մաս սկսում է կիրառել, բայց դրանք պետք է արվեն բոլորը միասին, որպեսզի արդյունք ունենան: Մենք հենց երկուշաբթի ասել էինք, որ պետք է ամբողջ բանակը բերել զորանոցային ռեժիմի, որպեսզի վարակը չներթափանցի բանակ: Արդեն այսօր 3 վարակված ունենք եւ ընդամենը այդ մեկ զորանոցն են փակել: Բանակը փակեք»,-ասաց Արթուր Խաչատրյանը:

Նրա խոսքով, թեեւ ուշացումով, կառավարությունը, այդուհանդերձ սահմանափակեց բացի կենսական նշանակության , մյուս օբյեկտների գործունեությունը, քաղաքացիների տեղաշարժի հետ կապված սահմանափակում մտցրեց, որի կիրառումը սակայն շատ խնդրահարույց է: «Չես կարող արգելել մարդկանց տեղաշարժը, եթե հասարակական տրանսպորտը գործում է, պետք է կանգնեցնել հասարակական տրանսպորտը, խիստ որոշակի ուղերձներ հղել, որոնք վերահսկելի են եւ սանիտարահիգիենիկ կանոնների պահպանմամբ են իրականացվում»,-կարեւորեց Արթուր Խաչատրյանը:

Այն ձեռնարկությունների աշխատակիցների տեղաշարժը, որոնք աշխատում են, ըստ Խաչատրյանի, պետք է ապահովեն կամ գործատուն կամ պետությունը, որովհետեւ հասարակական տրանսպորտի աշխատելու պայմաններում վիրուսի տարածումը կանխել հնարավոր չի լինելու:

Ինչ վերաբերում է կառավարության տնտեսական քայլերին, որոնք ուղղված են վիրուսի տնտեսական հետեւանքների վերացմանը, Արթուր Խաչատրյանն ասաց. «Նախ, հնարավոր չէ խոսել հետեւանքների վերացման մասին, քանի որ հետեւանքների մասին որեւէ պատկերացում չկա՝ որքա՞ն է տեւելու համավարակը, ի՞նչ խորությամբ է ընթանալու, աշխարհում ինչպե՞ս կզարգանա: Քանի դեռ այդ պատկերացումը չկա, կարող ենք խոսել միայն հետեւանքները վերացնելու մասին»:

Հիշեցնենք, որ այսօր կառավարությունը 5 փաթեթ է ընդունել, որոնք ուղղված են կորոնավիրուսի ստեղծած տնտեսական խնդիրները հաղթահարելուն: Որոշումներից մեկով , օրինակ, կառավարությունը 100 հազար դրամի չափով միանվագ դրամական օգնություն ցույց կտա այն քաղաքացիներին, որոնք ունեն անչափահաս երեխա եւ կորցրել են աշխատանքը մարտի 13-ից 25-ն ընկած ժամանակահատվածում:

«Մարդիկ գուցե աշխատանքը չեն կորցրել, փաստացի աշխատում են, բայց հարկադիր պարապուրդի վիճակում են: Նաեւ այդ քաղաքացիների մասին պետք է մտածել»,-նշում է Արթուր Խաչատրյանը՝ հավելելով, որ առաջին հերթին կառավարությունը պետք է աջակցի փոքր ու միջին բիզնեսին, որովհետեւ խոշոր ձեռնարկություններն այսպես ասած, «ամրության խնայողությունն» ունեն:

Ինչ վերաբերում է վարկային միջոցներով բիզնեսին աջակցելու կառավարության մոտեցմանը, Արթուր Խաչատրյանն ասաց. «Եթե ասում ես՝ բիզնեսին փող եմ տալիս, դու ակտիվություն ես խրախուսում: Մի կողմից չես կարող ասել՝ մնացեք տանը, մյուս կողմից՝ ակտիվություն բերել: ՓՄՁ-ին վարկ եք տալիս, ասում եք՝ գնացեք, հումք բերեք, բայց հումքը բերի, ի՞նչ անի, եթե բիզնեսը չի աշխատում կամ փող են տալիս եւ ասում են՝ հարկերը վճարեք, գուցե միանգամից հարկե՞րը զեղչեն»:

Իրավիճակի հաղթահարումը, Արթուր Խաչատրյանի համոզմամբ, հնարավոր է միայն պատճառահետեւանքային կապերը հաշվի առնելով.«Պատճառահետեւանքային կապերը խախտվել են , այս ճգնաժամի յուրօրինակությունը վիրուսն է, ճգնաժամը պայմանավորված չէ , օրինակ, պահանջարկի ակնկմամբ, պետք է նախ ապահովել բնակչության անվտանգությունն ու առողջությունը, կոնսերվացնել բիզնեսը, դրանից հետո միայն շուկա փող լցնել: Դա կարող է լինել վերաֆինանսավորման տոկոսադրույքի նվազեցումը, պարտադիր պահուստի տոկոսի նվազեցումը, ԿԲ-ն կարող է մտնել շուկա եւ ակտիվներ գնել, փող լցնել շուկա, պետության հարկաբյուջետային քաղաքականությունը կարող է լինել էքսպանսիոնիստական եւ այլն»:

Արթուր Խաչատրյանը դրական քայլ է համարում գյուղատնտեսության ոլորտում վարկերի զրոյացման նախաձեռնությունը, սակայն շեշտում է՝ գումարը պետք է ընտրողաբար տրամադրվի, օրինակ, նախ՝ հաց արտադրողին, ապա ՝ վարդակակաչ:

«Ռուսաստանը հացահատիկի արտահանումը արգելել է , մենք չգիտենք վաղն ինչ իրավիճակ է լինելու աշխարհում»,-նկատում է Արթուր Խաչատրյանը՝ շեշտելով, որ որեւէ մեկը չգիտի, թե այս իրավիճակը որքան կշարունակվի եւ եթե կորոնավիրուսով կրկնավարակման դեպքեր լինեն, իրավիճակն ավելի կբարդանա, ուստի պետական ռեսուրսները պետք է խնայողաբանար օգտագործել եւ կենտրոնացնել:

Աղբյուր` Փաստինֆո