Փաստ ինֆո

Լսում եմ Ազգային Ժողովի նիստը, պատգամավորների բարձրացրած հարցերը, կառավարության անդամների և վարչապետի պատասխաններն ու մտածում, որ մեծ հաշվով փողոցից, այսպես ասած՝ ժողովրդի ծոցից իշխանության եկածներն էլ շատ կարճ ժամանակ անց սկսեցին չհասկանալ ժողովրդին: Ճիշտ ժողովրդական ասացվածքի հանգույն՝ «կուշտը սովածին չի հասկանա»:

Ինչ խոսք՝ ժողովուրդ ասվածը լայն ու տարողունակ հասկացություն է, այդ ժողովրդի մեջ մտնում են և՛ ոչ բարձր աշխատավարձ ունեցող ուսուցիչն ու դասախոսը, գրադարանավարն ու գիտաշխատողը, բուժանձնակազմը, որ այս օրերին հերոսության օրինակներ է ցույց տալիս, բնականաբար, ուսանողը, որ իր ուսման վարձի կարիքները հոգալու համար աշխատում է նաև, շինարարության վրա աշխատող բանվորն ու գյուղի պարզ աշխատավորը, վարորդները, սպասարկման ոլորտի աշխատողները, բանկերի, մասնավոր այլ ձեռնարկությունների աշխատակիցները, և այլն, և այլն: Իհարկե, նաև մեր պապիկ-տատիկները, մեր արդեն պատկառելի տարիք ունեցող ծնողները: Ինչ խոսք, երբ վարչապետը բոլորին, հատկապես տանը մնալու այս մեկ շաբաթվա ընթացքում խորհուրդ է տալիս օնլայն ծառայություններից օգտվել՝ «համ էլ կսովորեք տարբերակով,,՝ պիտի հասկանա՝ բոլորը չէ, որ կարող են այդ ծառայություններից օգտվել: Ընդ որում, պատճառը ոչ միայն սերնդային տարբերությունն է, այլ ուղղակի այն պարզ, շատ պարզ ճշմարտությունը, որ մեր կողքին ապրող մարդիկ կան, միայնակ ծերեր, որ ընդամենը թոշակի հույսին են: Եվ իրենց չնչին թոշակը, որ հեռու է նվազագույն սպառողական զամբյուղի պարունակությունն ապահովելուց, ի սկզբանե բաժանում են՝ այսքանը կոմունալ վարձերի, այսքանը հաց ու պանրի, ձեթի ու մի քիչ բրնձի, սպիտակաձավարի կամ մակարոնի և այդ մարդկանց համար 10-20 դրամ ավել-պակասն էլ զգացնել է տալիս: Այսինքն, օնլայն պատվերների մասին խորհուրդներն այդ լսարանի համար չեն: Հաստատ:

Գանք արտակարգ դրությամբ պայմանավորված տուգանքներին, որոնք 100 հազար դրամից են սկսվում: Երեկ ողջ օրը ֆեյսբուքում քննարկվում էր մի տաքսու վարորդի հետ կատարվածը, որը մի քանի դրամ աշխատելու համար փողոց է դուրս եկել, բայց քանի որ առանց համապատասխան թղթի է եղել, մարդուն փողոց դուրս գալու համար 100 000-250 000 դրամ տուգանել են: Մի կողմից այսօր մինչև ժամը 18.00-ն տուգանելու հարց չպետք է լիներ, մյուս կողմից՝ հաջորդ խնդիրը՝ տաքսու վարորդն իր ապրուստը վաստակում է այդ ծառայությունը մարդկանց մատուցելով, այսինքն, թեկուզ մեկ շաբաթ աշխատանքից զրկվելն իր համար ճակատագրական է: Դեռ մի բան էլ՝ տուգանք է վաստակում: Սրանք հարցեր են, որոնց լուծումը պիտի կառավարությունը տա, իսկ որքանո՞վ է կառավարությունը պատրաստ քաղաքացիների՝ այս մեկ շաբաթյա ընթացքի ու արտակարգ դրությամբ պայմանավորված պարապուրդը փոխհատուցել: Իմ տպավորությամբ շատ անպատրաստ է:

Ընդ որում, ոչ միայն անպատրաստ է, այլև շատ հստակ բաժանարար գծեր է գծում արդեն:

Ասենք, մեկն ինձ կբացատրի՞, թե կառավարության անդամներն ու պատգամավորներն ինչու՞ դիմակ ու ձեռնոցներ չեն կրում: Ամեն Աստծո օր լուր ենք առնում այս կամ այն երկրի նախագահի կան վարչապետի, նախարարների կորոնավիրուսով վարակվածության մասին, վիրուսը չի խնայում նույնիսկ արքայական դինաստիաներին, իրենք ի՞նչ երաշխիք ունեն, որ վարակակիր չեն, ի հավելումն, խորհրդարանում տասնյակներով, եթե չասենք՝ հարյուր, նստած չե՞ն մտածում, որ մի նոր օջախ կարող են լինել: Թե՞ իրենք անտիվիրուս են ստացել և վախ չունեն:

Եվ ընդհանրապես, որքանո՞վ է ճիշտ, որ տանը մնալու պայմանը չվերաբերվեց նաև պատգամավորներին: Թե՞ ժողովրդի ծառաները որպես հատուկ «առանձնյակ» ժողովրդից պիտի զանազանվեն՝ հերոսություն որպես դիտարկելով ԱԺ դահլիճում իրենց հավաքվելը: Ըստ իս, տնից էլ ոչ պակաս կարելի էր աշխատել՝ կապի մեջ լինելով ժողովրդի հետ: Չէ՞ որ նրանք բոլորն ակտիվ ֆեյսբուքահայեր են և հեռավար կառավարմամբ էլ կարող են բարձրացնել ժողովրդին հուզող հարցերը:

Հեղինակ՝ Ա.Ե.

Աղբյուր` Փաստինֆո