Փաստ ինֆո

Կառավարությունն այսօրվա նիստում հաստատեց կորոնավիրուսի տնտեսական հետևանքների չեզոքացման առաջին միջոցառումը:

Այն ներկայացրեց ՀՀ էկոնոմիկայի նախարար Տիգրան Խաչատրյանը: Նախարարը նկատեց, որ առաջին աջակցության գործիքն իր ընդգրկման շրջանակով ամենալայնն է: Այն վերաբերում է ՀՀ-ում վերջին մեկ տարվա ընթացքում գործող բոլոր իրավաբանական անձանց և անհատ ձեռնարկատերերին. «Այսինքն հնարավորություն է ընձեռում այս աջակցության գործիքից օգտվել բոլոր իրավաբանական և անհատ ձեռնարկատերերին, որոնք գործում են վերջին 12 ամիսների ընթացքում: Գործունեության ոլորտի սահմանափակում չկա, սակայն բացառություն է արված բանկերի, վարկային կազմակերպությունների, գրավատների և ապահովագրական կազմակերպությունների համար: Այսինքն ֆինանսական ոլորտում գործող կազմակերպություններն են, որոնք չեն կարող դիմել այս գործիքից օժանդակության համար: Կազմակերպությունները կառավարության աջակցությունից օգտվելու համար կարող են դիմել բանկային և վարկային համակարգին:

Այս կազմակերպությունների ընտրությունը կատարվում է ֆինանսական կազմակերպությունների միջոցով: Երբ ֆինանսական կազմակերպությունը որոշում է, որ այդ կազմակերպությունն իրենց ճիշտ գործընկերն է, այսինքն` ունի համագործակցության բավարար փորձ, ապա աջակցության գործիքի շրջանակներում որոշում է առավելագույն ֆինանսավորման չափը, որը կարող է լինել մինչև 500 մլն դրամ: Այս եղանակով տրված ֆինանսական աջակցությունը կարող է օգտագործվել, եթե 1. կազմակերպությունն այդ միջոցները վերցնում է, որպեսզի աշխատակիցներին աշխատավարձ վճարի 3 ամիսների համար, 2. Այս միջոցներն օգտագործում են ՀՀ-ի նկատմամբ ունեցած տեղական ինքնակառավարման մարմինների կամ պետբյուջեի նկատմամբ ունեցած հարկային պարտավորությունները սպասարկելու կամ կատարելու համար, 3. Եթե այս միջոցներն օգտագործելու է այնպիսի հումք ձեռք բերելու համար, որը պետք է ՀՀ-ում օգտագործվի իր արտադրությունը սպասարկելու նպատակով, 4. Եթե այնպիսի սարքավորումներ է ներկրում, որոնք պետք է օգտագործվեն իր արտադրական նպատակներով, 5. Եթե վճարում է կոմունալ ծառայություններ»,-ասաց Տիգրան Խաչատրյանը:

ՀՀ վարչապետ Նիկոլ Փաշինյանը նկատեց այս վարկերը տալիս են նաև աշխատողներին աշխատավարձ վճարելու համար, հարկերի և տուրքերի վճարման համար. «Մենք պետք է այս գործող օրգանիզմի կենսունակությունն ապահովելու ճանապարհով գնալ: Դրա համար երկու գործիք են կիրառել: Առաջինն ասել ենք, որ տոկոսները սուբսիդավորում ենք: Երկրորդ գործիքը հետևյալն է, քանի որ շուկան շատ վատ վիճակում է, բանկերը կարող են հակված չլինել այդպիսի վարկավորում տալ և որպեսզի բանկերին խթանենք, որ շահագրգռված լինեն, կառավարությունն ասում է, որ ըստ ծրագրերի աշխատավարձերի դեպքում փողի 50 տոկոսն ենք տալիս, հարկերի դեպքում փողի 50 տոկոսն ենք տալիս, կոմունալ վճարի դեպքում 45 տոկոսն ենք տալիս, հումքի դեպքում 40 տոկոսը, սարքավորումների պարագայում 25 տոկոսը, սննդամթերքի ներկրման դեպքում 30 տոկոսը»,-ասաց վարչապետը նշելով, որ լավ բանաձև են գտել, որն իր կենսունակությունը պետք է պրակտիկայում ապահովի:

Աղբյուր` Փաստինֆո