Փաստ ինֆո

ԱԺ-կառավարույուն հարցուպատասխանի ժամանակ պատգամավոր Արկադի Խաչատրյանը վարչապետից հետաքրքրվեց՝ արդյո՞ք կառավարությունը համաճարակի տեւողությունից կախված դիտարկել է տնտեսական զարգացման տարբեր սցենարներ, օրինակ՝ մեկ ամիս, երեք ամիս, վեց ամիս:

«Ակնհայտ է, որ շատ կարճաժամկետ ծրագրերի պարագայում մենք շեշտադրումը դնում ենք , այո, զարգացման ծրագրերի վրա, որպեսզի վաղը ստագնացիա չունենանք, բայց եթե մենք դիտարկենք ավելի երկար սցենարներ, ապա զարգացման ծրագրերը աստիճանաբար տեղ սկսում են զիջել գոյատեւման ծրագրերին եւ կառավարությունը պետք է ունենա նաեւ այս իրավիճակին դիմակայելու ռազմավարություն»,-ասաց նա:

Ըստ պատգամավորի, հակաճգնաժամային միջոցառումներով կառավարությունը հիմնականում վարկ վերցնել է առաջարկում, մինչդեռ գոյատեւման պարագայում վարկ վերցնելն արդյունավետ չի կարող լինել: Պատգամավորը նաեւ հետաքրքրվեց՝ արդյո՞ք կառավարությունը սոցիալական աջակցության ծրագրեր ունի:

Ի պատասխան Փաշինյանն ասաց՝ այնպես չէ, թե կառավարությունը սոցիալական ծրագրեր չունի, նա տեղեկացրեց, որ վաղը կառավարությունը 5 փաթեթ է քննարկելու, որտեղ կա նաեւ սոցիալական բաղադրիչ: Ըստ Փաշինյանի, սոցիալական օգնությունը շատ գայթակղիչ է հնչում, բայց այն ավերածություններ է արել երկրում, որը մինչ օրս չենք կարողանում հաղթահարել:

«Մեր հիմնական ուղերձը պետք է լինի այն, որ սոցիալական բարդությունները պետք է հաղթահարել աշխատանքի միջոցով: Մենք հիմա ամեն ինչ անում ենք, որ աշխատողին պահենք աշխատավայրում, աջակցենք , որ նա աշխատավարձ ստանա եւ չհայտնվի սոցիալական աջակցության կարիք ունեցողների խմբում»,-ասաց վարչապետը
Խոսելով ռազմավարության մասին, Փաշինյանն ասաց՝ մենք ասել ենք՝ կյանք կա ոչ միայն կորոնավիրուսից հետո, այլեւ կորոնավիրուսի ժամանակ.«Հո՞ չենք պատրաստվում 6 ամիս քաղաքացիներին փակել, ասել՝ դուրս չգաք, մենք մի շաբաթով ենք սա սահմանել, սրա ազդեցությունը կդիտարկենք պրոցեսների վրա»,-ասաց նա՝ հավելելով, որ օրինակ կապիտալ շինարարությունն ամենալավ սոցիալական աջակցությունն է, որ մարդկանց աշխատավարձ ստանալու հնարավորություն կտա:
«Եկեք էդ փարոսային փոսի մեջ չխրվենք»,-հայտարարեց վարչապետը՝ նշելով, թե այս համակարգը ստեղծվել է՝ մարդկանց ընտրակաշառքից կախված պահելու համար:
Մանրամասները՝ տեսանյութում:

Աղբյուր` Փաստինֆո