Փաստ ինֆո

Ինձ մոտ այպիսի տպավորություն է, որ մենք շատ դեպքերում օրենսդրական փաթեթներն ընդունում ենք թռչնակով նշում կատարելու համար, որ տեսեք սա էլ արեցինք։ Երբ փորձում եմ պատկերացնել այս օրենքի նախագիծը կիրառության մեջ հասկանում եմ, որ այն կամ չի կիրառվելու, կամ կիրառվելու է ի չարս։ Այս մասին այսօր Ազգային ժողովում «Հայաստանի Հանրապետության դատական օրենսգիրք» սահմանադրական օրենքում փոփոխություններ եւ լրացումներ կատարելու մասին և կից ներկայացված օրենքների նախագծերի փաթեթի վերաբերյալ քննարկումների ժամանակ ասաց ԱԺ «Լուսավոր Հայաստան» խմբակցության պատգամավոր Տարոն Սիմոնյանը։

Նա ընդգծեց, որ սա օրենսդիր աշխատանքի դեպքում անընդունելի մոտեցում է․ «Այն խնդիրները, որ գեներացվել էին վերջին ժամանակահատվածում, դրանց լուծմանը միտված չէ այս նախագիծը։ Այն ընդհանրապես միտված է մեկ այլ խնդիրների առաջացմանը»։

Սիմոնյանի խոսքով, եթե անգամ այս փոփոխություններն անհրաժեշտ են, միևնույն է համաչափ չեն․ «երբ վատ դատավորի դեմ եք ուղղում նախագիծը, այդ վատ դատավորը ադապտիվ դատավոր է, նախկինում հարմարվել է նախկին իշխանություններին, հիմա այս համակարգից շատ լավ օգտվելու է նոր իշխանություններին հարմարվելու համար։ Որպես այդպիսին, լավ դատավորները դուրս են գալու համակարգից, որովհետև այսչափ անիմաստ լծակներ իրենց գլխին չեն ցանկանալու անընդհատ ունենալ, որովետև կարգապահական վարույթներ անհարկի, հայեցողական մոտեցումներով, երբ սկսեն հարուցվել, լավ դատավորները զբաղվելու են մասնավոր պրակտիկայով, վատերն էլ մնալու են, իրենց հավատարմության երդումը տան ցանկացած իշխանությանն ու շարունակեն գործունեությունը»։

Նա նշեց, որ իշխանությունը մարդկանց փչացնում է և մարդիկ աստիճանաբար վատն են դառնում, հետևաբար ինստիտուցիոնալ մակարդակում այնպիսի կառուցվածքներ պետք է լինեն օրենքների տեսքով, որ ինչքան էլ իշխանությունը «վատանա», միևնույն է գործադիր իշխանությունը չկարողանա դատականի նկատմամբ վերահսկողություն իրականացնել։

Աղբյուր` Փաստինֆո