Փաստ ինֆո

Ազգային ժողովը քննարկում է «Հայաստանի Հանրապետության դատական օրենսգիրք» սահմանադրական օրենքում փոփոխություններ եւ լրացումներ կատարելու մասին և կից ներկայացված օրենքների նախագծեր փաթեթն երկրորդ ընթեցմամբ և ամբողջությամբ ընդունելու հարցը։

Արդարադատության նախարար Ռուստամ Բադասյանը տեղեկացրեց, որ առաջինի ընթերցմամբ ընդունվելուց հետո նախագծում փոփոխություններ են կատարվել ,որոնք պետաիրավական հարցերի մշտական հանձնաժողովում քննարկվել են։ Բադասյանի խոսքով, ընդդիմադիր խմբակցությունների կողմից ներկայացված առաջարկները նույնպես քննարկվել են և դրանցից որոշներն ընդունվել են։

«Ամեն դեպքում, կոնցեպտուալ առումով նախագիծը չի փոխվել, այն շարունակում է մնալ արդյունավետ գործիք՝ կոռուպցիայի դեմ պայքարն արդյունավետ իրականացնելու և միաժամանակ դատական իշխանության անկախությունը չխաթարելու համար»,-ասաց Բադասյանը։

Նա հիշեցրեց, որ նախագծով փոխվում է կարգապահական վարույթ նախաձեռնելու իրավունք ունեցող մարմինների շրջանակը, դրանում ավելացվում է կոռուպցիայի կանխարգելման հանձնաժողովը։

«Բոլոր այն դեպքերում, երբ խոսքը գույքային դրությունը ստուգելու մասին է, այսինքն` ստուգումը հայտարարագրերի վերլուծության արդյունքում խախտումներ կան, թե ոչ կամ թերհայտարարագրումներ են հայտնաբերվում, այդ դեպքում կոռուպցիայի կանխարգելման հանձնաժողովն իրավունք է ստանում կարգապահական վարույթ հարուցել։ Էթիկայի կարգապահական հարցերի հանձնաժողովը ձևավորվում է և նախկին կարգապահական հանձնաժողովի ֆորմատն է փոխվում որոշակի առումով, քանի որ նաև ոչ դատավոր անդամներ են ընդգրկվում նշված հանձնաժողովի կազմում, ինչը ողջունվել է միջազգային կազմակերպությունների, մասնավորապես Վենետիկի հանձնաժողովի կողմից, շեշտելով, որ նմանատիպ մոդելն էլ ավելի կնպաստի մարմնի գործունեության թափանցիկությանը, հաշվետվողականությանը>>,-ասաց Բադասյանը։

Նա տեղեկացրեց, որ փոխվել է նաև գնահատման հանձնաժողովի մոդելը և որոշ դեպքերում, եթե կոպիտ, ակնհայտ խախտումներ հայտաբերի գնահատման հանձնաժողովը, ապա վերջինս հնարավորություն կստանա հարցն ուղղել էթիկայի կարգապահական հանձնաժողովին՝ կարգապահական վարույթ հարուցելու հարցը քննարկելու համար։

Աղբյուր` Փաստինֆո