Փաստ ինֆո

Կորոնավիրոսի վտանգով պայմանավորված Արցախում մարտի 31-ին սպասվող նախագահական եւ խորհրդարանական ընտրությունները հետաձգելու որեւէ հիմք չկա: «Փաստինֆո»-ի հետ զրույցում նման կարծիք հայտնեց Արցախի «Ազատ Հայրենիք» կուսակցության մամլո քարտուղար Վահրամ Պողոսյանը:

«Մեզ մոտ ոչ մի բան չի արգելվել, ուղղակի նախագահի մի շարք թեկնածուների կողմից նախաձեռնություն է եղել, որպեսզի, հաշվի առնելով կորոնավիրուսի տարածման վտանգը, դադարեցվեն փակ տարածքներում հանդիպումները, իսկ մենք՝ կոնկրետ մեր քաղաքական ուժը եւ մեր նախագահի թեկնածուն՝ Արայիկ Հարությունյանը, հայտարարել է, որ այսօր արդեն վերջին հանդիպումն է անցկացնում նաեւ բաց տարածքներում»,-մեզ հետ զրույցում փոխանցեց Վահրամ Պողոսյանը՝ հավելելով, որ այս պահին քաղաքական ուժն ու նախագահի թեկնածուն գտնվում են Ասկերան քաղաքում: «Քիչ հետո կսկսվի ասկերանցիների հետ մեր հանդիպումը, իսկ երեկոյան ժամը 19.00-ին մեր վերջին հանդիպումը կլինի Ճարտար քաղաքում, այդպիսով մենք կավարտենք մեր հանդիպումները հասարակության հետ»:

Վահրամ Պողոսյանի փոխանցմամբ, նախընտրական քարոզարշավն « Ազատ Հայրենիք»-ը այնուհետեւ կանցկացնի օնլայն տիրույթում , կօգտագործեն մասնավոր եւ Հանրային հեռուստաընկերությունների տրամադրած եթերաժամանակը: «Բոլոր ցուցումներին հետեւելով, մեզնից կախված ամեն ինչ կանենք, որպեսզի վարակը չտարածվի: ԿԸՀ-ն արդեն հայտարարություն տարածել է, բոլոր կանխարգելիչ միջոցառումները կազմակերպվելու են, եթե չեմ սխալվում, մեկ ընտրողին մեկ գրիչ է տրամադրվելու, այսինքն` նույն գրիչը երկու անգամ չի օգտագործվելու եւ այդ առումով ռիսկը հաշվի է առնվել, բացի դրանից դիմակներն են, ալկոգելի շշերն են տեղադրված լինելու, ախտահանման այլ միջոցառումներ կիրականացվեն՝ առողջապահության նախարարության վերահսկողության ներքո: Նաեւ կոնկրետ ընտրությունների օրը կիրականացվեն բոլոր կանխարգելիչ միջոցառումները, որպեսզի խնդիր չառաջանա»,-ասաց Վահրամ Պողոսյանը:

Դիտարկմանը, թե սպասվող ընտրությունները չհետաձգելով, արդյո՞ք քաղաքական խնդիրը չի գերադասվում առողջապահական խնդրին, Վահրամ Պողոսյանն արձագանքեց. «Ես կարծում եմ, որ դա ավելի շատ շահարկվում է, փառք Աստծո , մինչեւ այս պահը մենք Արցախում գրանցված վարակի որեւէ դեպք չունենք, կրկնում եմ՝ իրականացվում են բոլոր կանխարգելիչ միջոցառումները եւ այս պահին որեւէ հիմնավորում չկա , որպեսզի մենք ընտրությունները հետաձգենք»:

Նրա խոսքով, ինչպես նախկինում, այնպես էլ հիմա, բոլոր գործընթացները կազմակերպվում են՝ հաշվի առնելով երկրի շահը եւ այսօր էլ ընտրությունները Արցախում պետք է անցկացվեն ՝ գերադասելով ոչ թե քաղաքական, այլ երկրի շահը: «Ի վերջո, մենք բոլորս հասկանում ենք, թե այդ ընտրությունները որքան կարեւոր են երկրի հետագա զարգացման համար»,-շեշտեց մեր զրուցակիցը:

Հարցին, թե ի՞նչ ռիսկեր կարող են առաջանալ, եթե օրինակ 2 շաբաթով ընտրությունները հետաձգվեն, Վարդան Պողոսյանը պատասխանեց, թե հարցը քննարկել են, բայց որեւէ հիմնավորում չկա հետաձգելու համար:

«Եթե ինչպես Դուք եք նշում, հստակ լիներ, որ դա թեկուզ մեկ տոկոսով կնվազեր այդ ռիսկը, իհարկե, կարելի էր հետաձգել, բայց քանի որ անորոշ է եւ մենք չգիտենք, օրինակ 2 շաբաթ է տեւելու, 2 ամիս , թե երկու տարի, հիմնավորում չկա, ընդհակառակը, քանի դեռ ամեն ինչ կայուն է, խնդիրներ չկան, պետք է ամեն ինչ անել, որպեսզի նախանշած ժամկետներում կարողանանք այդ ամենը ավարտել»:

Նշենք, որ Արցախի Հանրապետությունում նոր կորոնավիրուսային վարակի հաստատված դեպք, համաձայն պաշտոնական տեղեկատվության չկա: Երեկ տեղեկացրել էինք, որ բուժհաստատությունում մեկուսացված է 3 քաղաքացի:

Հավելենք, որ այսօր Արցախի տեղեկատվական շտաբից հայտնել են, որ ԱՀ մշակույթի, երիտասարդության հարցերի և զբոսաշրջության նախարարությունը չեղարկել է մի շարք միջոցառումներ՝ Կորոնավիրուսի տարածման կանխարգելման և համաճարակային վիճակի կայուն պահպանման նպատակով ։
ԱՀ ՄԵՀԶ նախարարությունը շարունակում է հորդորել ՀԿ-ներին ու մասնավոր կազմակերպություններին զերծ մնալ մասսայական միջոցառումների կազմակերպումից ու մասնակցությունից։
Հիշեցնենք, որ մարտի 31-ին նախատեսվում է Արցախում անցկացնել ԱՀ Նախագահի և Ազգային ժողովի հերթական ընտրությունները, որը հետաձգելու մասին որոշում առ այս պահը չկա։

Նշենք նաեւ, որ դեռ մարտի 20-ին Արցախ ԱԱԽ նախկին քարտուղար, նախագահի թեկնածու, գեներալ Վիտալի Բալասանյանը հանդես եկավ հայտարարությամբ, որում ասվում էր, որ որքան շուտ Արցախում արտակարգ դրություն հայտարարվի, այնքան ավելի շատ կյանքեր կփրկվեն:

Աղբյուր` Փաստինֆո