Փաստ ինֆո

Varks.am վարկային կազմակերպության լիցենզիան ուժը կորցրած ճանաչելն այնքան էլ լավ ազդակ չէ պետության արտաքին տնտեսական գրավչության համար: «Փաստինֆո»-ի հետ զրույցում նման կարծիք արտահայտեց «Հայացք» վերլուծական կենտրոնի փորձագետ, տնտեսագետ Լիլիա Ամիրխանյանը։ 

Փորձագետը վարկային կազմակերպության լիցենզիան դադարեցնելու մասին որոշումը հենց այս պահին կայացնելը երկակի է գնահատում: Մի կողմից վարկային կազմակերպությունների նկատմամբ բնակչության դժգոհություններն են , որոնք օբյեկտիվ են և որոշ առումով նաև արդարացված:

Մասնավորապես վերջին օրերին այս դժգոհություններին ավելացան նաև Varks.am-ի բնակչությանը որևէ կերպ չընդառաջելու գործընթացները: Եվ բնակչության բողոքի թիրախ հանդիսացած վարկային կազմակերպությանը լիցենզիայից զրկելն այսօր քաղաքացիների մոտ դրական է գնահատվում, սակայն Լիլիա Ամիրխանյանը նշում է, որ պետք է ավելի խորը դիտարկել այս գործընթացի հետևանքները մեր բանկային, ֆինանսական ոլորտի վրա, հանրության վրա, ինչպես նաև պետության իմիջի վրա:

«Ֆինանսական այս կառույցի գործունեության դադարեցումը փաստացի իրականացվում է շատ միանգամից: Անկախ նրանից, որ Կենտրոնական բանկը ներկայացնում է լիցենզավորման գործընթացների ժամկետներ, այնուամենայնիվ եթե չեմ սխալվում կազմակերպությանը խիստ զգուշացում կամ ինչ-որ գործողությունների սահմանափակում ԿԲ-ի կողմից չէր իրականացվել»,-նկատեց Լիլիա Ամիրխանյանը:

Վերջինս նշեց, որ ԿԲ-ի որոշման մեջ արձանագրված է կետ, որ վարկային այդ կազմակերպության հետ վարկային պարտավորությունների մեջ գտնվող քաղաքացիների շահերը սպասարկելու հետ կապված գործընթացներն իրականացնելու է ԿԲ-ի հանրային կապերի ծառայությունը: Սակայն վարկային կազմակերպության նկատմամբ ֆինանսական պարտավորություններն ամբողջությամբ պետք է մարվեն. «Առայժմ պարզ չէ, թե ինչ ժամկետներ կտրամադրվեն դրա համար: Ենթադրում եմ, որ վարկերի հավաքագրումը միգուցե մինչև պաշտոնական լուծարումը չլինի, բայց այնուամենայնիվ քաղաքացիների առաջ ինչ-որ վերջնաժամկետ է դրվելու, որը շատերի դեպքում լինելու է սեփական եկամուտների սեղմում: Այսինքն եթե այլ հավասար պայմաններում նույն քաղաքացին կարող էր այդ կազմակերպության առաջարկած գործիքներով հետաձգել կամ երկարաձգել իր պարտավորության մարումը, ապա այս պարագայում հստակ է: Ինչ որոշում էլ լինի, կարծում եմ վերջնաժամկետով կլինի: Բայց հուսանք, որ այդ ամենը կիրականացվի հնարավորինս արդյունավետ և այնպես, որ քաղաքացիներին լրացուցիչ հարված չլինի»,-ասաց փորձագետը:

Ըստ նրա սա պետության կողմից հերթական ազդակն է միջազգային ներդրողներին, որ հնարավոր է ինչ-որ պահից սկսած ելնելով ինչ-ինչ պատճառներից, այդ թվում չի բացառվում նաև հանրային ճնշումները, ԿԲ-ն կամ ոլորտային որևէ այլ պետական մարմին միանգամից կասեցնի նախագիծը, տնտեսական գործունեությունը, ինչն ըստ փորձագետի այդքան էլ լավ ազդակ չէ մեր պետության արտաքին տնտեսական գրավչության համար:

Հարցին արդյոք սա դրական ազդեցություն կարող է ունենալ առևտրային բանկերի կամ վարկային մյուս կազմակերպությունների համար, Լիլիա Ամիրխանյանը նկատեց առնվազն այս պահին Varks.am-ի լուծարումն առևտրային բանկերի համար չենք կարող դրական գնահատել: Ավելին գուցե դա որոշակի ռիսկեր ու մարտահրավերներ ծնում. «Եթե ԿԲ-ի որոշման հիմքում ընկած է նաև վերջին օրերին վարկային կազմակերպության նկատմամբ առաջացած դժգոհությունները, ապա սա ազդակ է բանկային ոլորտին և վարկային մյուս կազմակերպություններին, որ բացառված չէ ինչ-որ մի օր էլ իրենց նկատմամբ հանրության բողոքներն էլ հանգեցնեն ռեպրեսիվ գործողությունների: Հետևաբար չենք կարող դրական գնահատել: Ավելին մնացած վարկային կազմակերպությունները ևս կարող են մտավախություն ունենալ այս առումով: Մյուս կողմից, սակայն, սա որոշակի ռիսկեր կարող է առաջացնել: Վարկային կազմակերպությունները, մտավախությնուն ունենալով, միգուցե իրականացնեն ինչ-որ գործողություններ, օրինակ ոչ այնքան հանդուժող մոտեցում ցուցաբերեն քաղաքացիների նկատմամբ և ամեն կերպ փորձեն երաշխավորել իրենց կապիտալը»,-նշեց Լիլիա Ամիրխանյանը:

Փորձագետը նշում է ԿԲ-ն այս քայլով դրական տրամադրություններ ստեղծեց հանրության մեջ, քանի որ դժգոհություններն օբյեկտիվ էին, սակայն Լիլիա Ամիրխանյանի կարծիքով ԿԲ-ն կարող էր ավելի վաղ նման գործընթաց ձեռնարկեր կամ առնվազն արձագանքեր քաղաքացիների բողոքներին. «Իհարկե Varks.am-ի լիցենզիան կասեցնելը քաղաքացիների դժգոհություններով պայմանավորելը ենթադրյալ կարծիք է: ԿԲ-ի որոշման մեջ լուծարման պատճառը նշված է ֆինանսական կազմակերպությունների կանոնադրական կապիտալի պահանջներին չբավարարելու խնդիրը: Բայց եթե նույնիսկ դա այդպես է, այս պահին տնտեսական անկայունության և այս տատանումների ֆոնին նույնիսկ այդ կանոնի խախտման դեմ ԿԲ-ի գործողությունները չպետք է այդքան կտրուկ լինեին: Կարծում եմ շատ ավելի լավ կլիներ, որ լիներ զգուշացում, միգուցե պատժամիջոցներ կիրառվեին, դրա հետ միաժամանակ նաև ԿԲ-ն հորդորեր ընդառաջել և հանդուրժող լինել քաղաքացիների նկատմամբ հայտարարված արտակարգ դրության ժամանակահատվածում: Դա կլիներ ամենաարդյունավետ լուծումը»,-շեշտեց փորձագետը:

Արդեն իսկ հանրային տրամադրություններ են ստեղծվել, որ եթե Varks.am-ի նկատմամբ կիրառում են այս ամենը, ապա մյուս վարկային կազմակերպություններն ինչով են տարբերվում և հանրությունը արդեն ակնկալում է շղթայական էֆեկտը. «Սա ևս մի խնդիր է առաջացնում: Անկախ ԿԲ-ի որոշումից, հանրությունը միտված է կարծել, որ եղան բողոքներ և ԿԲ-ն հանրությանն ընդառաջեց և իրականացրեց այդ գործողությունը: Հետևաբար հանրության մոտ այդ սպասումը, որ լավ բողոքենք, կստացվի, տնտեսության համար լավ ազդակ չէ: Անկախ ամեն ինչից դրանք մասնավոր, շահույթ հետապնդող կառույցներ են, որոնք մեր տնտեսական աշխուժության մեջ որոշակի մասնաբաժին են կազմում»,-հավելեց Լիլիա Ամիրխանյանը

Հեղինակ Հասմիկ Կոշկարյան

Աղբյուր` Փաստինֆո