Փաստ ինֆո

ՀՀ վարչապետ Նիկոլ Փաշինյանն այսօր Ազգային ժողովում անդրադարձել է վարկային արձակուրդի թեմային։

ԱԺ անկուսակցական պատգամավոր Տիգրան Ուլիխանյանը վարչապետին առաջարկել է, որ վարկերի հետ կապված հստակ որոշում լինի, ապա ավելացրել, որ ինքը պատրաստվում է վարկային արձակուրդի հետ կապված օրինագիծ դնել շրջանառության մեջ։

Վարչապետը պատասխանել է, որ ինքը վարկային արձակուրդին դեմ է, ապա ավելացրել, որ կարող է վարկառուն անպատասխանատու գործընկեր է ու այս ընթացքում իր պարտավորությունները հավուր պատշաճի չի կատարել։

«Ասենք բնականոն աշխատող, դիմակ կամ ալկոգել վաճառող մարդկանց ինչու՞ պետք է վարկային արձակուրդ տանք։ Բարեհաջող առևտուր իրականացնող անձանց ինչու՞ պետք է արձակուրդ տանք։ Խնդիրներ ունեցող մարդկանց համար մենք այսօր աջակցության 5 փաթեթ ենք պատրաստել, մյուս շաբաթ էլի փաթեթներ կլինեն»,-ասաց Փաշինյանը։

Վարչապետի խոսքով, շատ հեշտ է ասել, որ եկեք հարկերից, վարկերից ազատենք մարդկանց, սնունդ բաժանենք, կոմունալ վարձերը չվերցնենք․ «Այդ լու՞րջ եք ասում, հո տենց ասելով չէ, այդ խոսքի արժեքին էլ պետք է հետևել։ Օրենսդրական նախաձեռնությամբ հանդես եկեք Հայաստանի բոլոր քաղաքացիներին 10 հազար դոլար բաժանեք՝ ոմանց ունեցվածքը բռնագրավելու միջոցով։ Եկեք, առաջարկում եմ, բոլոր քաղաքացիներին 10 հազար դոլար բաժանենք, անխտիր, առաջին հերթին քաղաքական գործիչների ունեցվածքը բռնագրավելու արդյունքում։ Դուք նախաձեռնեք, կոնսենսուս ձևավորենք․․․»։

Փաշինյանն ընդգծեց՝ տպավորություն է, թե պատգամավորները գումար են ուզում բաժանել, Կառավարությունն էլ թույլ չի տալիս․ «Գնացեք ձեր շրջապատի հարստությունը բաժանեք մարդկանց, հերիք է, հա՛»։

Տիգրան Ուլիխանյանը հարցրեց, թե արդյոք Փաշինյանն իր կողմից անհարգալից վերաբերմունք է նկատել․ «Ձեռք եք առնումը ո՞րն է, յուրաքանչյուր պատգամավոր իրավունք ունի իր միտքն արտահայտել, օրենսդրական նախաձեռնությամբ հանդես գալ, մտահոգություն արտահայտել։ Ասում եմ միասին աշխատենք, 550․000 սպառողական վարկ վերցրած մարդ կա, այդ մարդիկ լեն օրվանից չեն վարկ վերցնում։ Ես Ձեզ ասում եմ խնդիր կա, Դուք չեք ուզում իմ մեկնած աջակցության ձեռքը սեղմեք, ինձ ուրիշ բաներ եք պատմում։ Դուք էիք մինչ հեղափոխությունն ասում բռնագրավենք բոլորի գույքը, կոպեկ առ կոպեկ հետ բերենք․․․Ձեր ասած անպատասխանատու վարկառուն 3 ամիս հետո գնալու է մուծի գումարը, ոչինչ, թող 3 ամիս էլ անպատասխանատու լինի, բա ֆորսմաժոր է, ճնգնաժամ է»։

Փաշինյանն ասաց, որ ինքը 2012թ-ից Ազգային ժողովի պատգամավոր է և իրենց տանն ամեն ինչ գնել են սպառողական վարկերով․ «Մի հատ կարո՞ղ եք բացատրել, ինձ ինչու՞ պետք է հարկային արձակուրդ տային ֆորսմաժորի բերումով։ Այստեղ լիքը մարդ հաստատ սպառողական վարկով բան ունի գնած, սակայն աշխատավարձ նորմալ ստանում են, կարո՞ղ եք բացատրել իրենց ինչու արձակուրդ տանք»։

Անդրադառնալով գումարները վերադարձնելու վերաբերյալ Ուլիխանյանի դիտարկմանը՝ վարչապետն ասաց․ «Այո, կոպեկ-կոպեկ հետ ենք բերելու և Սահմանադրական հանրաքվեն նրա համար ենք դրել, որ մաֆիոզներն իրենց մաֆիաները մաֆիոզ կառույցներով ու մաֆիոզ իրավաբաններով չպաշտպանեն։ Կոպեկ-կոպեկ հետ ենք բերելու, այդ թվում այն տեղերից, որտեղից մտածում եք չենք հասցնի ու չենք բերի։ Որ բերենք վարկառուներին անպայման այդ գումարներից միջոցներ կտրամադրենք»։

Աղբյուր` Փաստինֆո