Փաստ ինֆո

Օրավարձով ապրող մարդիկ սովի են մատնված: Այս մասին լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը:

Մարուքյանի խոսքով՝ աշխարհի որևէ երկրում չկա այնպիսի վիճակ, որ մարդկանց ասեն՝ նստեք տանը և նրանց հացի խնդիրը չլուծեն:
«Դրան գումարած՝ կոմունալների վարձերն ուզում են, ցանցերից ասել են ՝ չեն անջատի, Վեոլիա ջրից դեռ նորություն չկա: Պետք է համալիր լուծումներ տրվի:

Հենց հիմա ԿԲ-ում Հայաստանը ունի 370 մլրդ դրամ փող, դա մեր ժողովրդի փողն է: Հիմա գոնե այն թիրախ խմբին, ով օրավարձով էր ապրում և հիմա ապրելու միջոց չունի, պետք է պետությունն աջակցի, թե ոչ: Որևէ խոսք չկա դրա մասին: Իշխանությունները լայվ են մտնում ու պատմում, թե ինչպես կարելի է տանից դուրս չգալ, հասկացանք, բա ոնց պետք է ապրեն՞»,- ասաց Մարուքյանը՝ հավելելով. «Տատիկ-պապիկներին ասվել է, որ 10-12-ը գնան խանութներ, որ մենք չգնանք, տատիկ-պապիկներին չվարակենք, բայց ինչ որ մեկը հարցրել է՝ տատիկ-պապիկները փող ունե՞ն, որ գնան խանութ»:

Մարուքյանը գտնում է, որ ԿԲ-ում դրված գումարներից պետք է թիրախային աջակցություն ցուցաբերվի:

Մարուքյանը նշեց, որ իշխանությունները պետք է հասցեական արձանագրեն:

«Օրինակ հիմա՝ սոցապ նախարարը գիտի՞ քանի մարդ է տանը նստած և օրավարձով ապրող մարդկանցից է և չի կարողանում ապրել:Հաշվարկե՞լ են քանի մարդ է հիմա մնացել անգործ»,- ասաց Մարուքյանը:

Հարցին, թե արդյո՞ք այդ առաջարկները ներկայացրել են, Մարուքյանը պատասխանց, որ, երբ ասում էին՝ Իրանի սահմանը փակեն՝ ձեռք էին առնում, Միլանի չվերթը փակեն՝ ձեռք էին առնում:

Նրա խոսքով՝ օրհասական է դարձել վարկերի հարցը: Մարուքյանը նշեց, որ Վարկս էյ էմ վարկային կազմակերպությունը զրկվել է լիցենզիայից և Մարուքյանի գնահատմամբ՝ դա լավ լուր է, որովհետև տոտալ խախտումներ կային, սակայն բանկերի և այլ կազմակերպությունների վերաբերյալ դեռևս տեղեկատվություն չունեն:

Աղբյուր` Փաստինֆո