Փաստ ինֆո

Մինչեւ 2017 թվական նշանակված դատավորների բարեվարքությունն ինչպես է ստուգվելու։ ԱԺ-ում հռետորական հարց է հնչեցրեց ՀՀ ԱԺ «Լուսավոր Հայաստան» խմբակցության ղեկավար Էդմոնդ Մարուքյանը։ 

Ինչպես արդեն տեղեկացրել ենք՝ ԱԺ-ում այսօր քննարկվում է «Հայաստանի Հանրապետության դատական օրենսգիրք» սահմանադրական օրենքում փոփոխություններ եւ լրացումներ կատարելու մասին և կից ներկայացված օրենքների նախագծերի փաթեթը՝ երկրորդ ընթերցմամբ ընդունելու համար։ Ինչպես նշեց խմբակցության ղեկավարը՝ փաթեթը նախատեսում է, որ ստուգվելու են 2017թ-ից հետո նշանակված դատավորները, իսկ մինչև 2017թ-ը նշանակված դատավորների նկատմամբ որևէ գործընթաց չի կարող լինել։

«Հարց, այսքան քննարկում էինք դատական իշխանության վեթթինգ ենք անելու, ոնց է լինելու, մինչեւ 2017 թվականը նշանակված դատավորների հետ ոնց ենք վարվելու»,- նկատեց Մարուքյանը։

Դառնալով կոռուպցիայի կանխարգելման հանձնաժողովի դերակատարության մասին քննարկումներին՝ Էդ.Մարուքյանը նկատեց. տպավորություն է, որ այն մի ամենակարող հանձնաժողով է, ինչ ասես կարող է անել։ «Այդ հանձնաժողովը գործիքներ չունի, այս փաթեթով գործիքներ չենք տվել։ Ո՞նց են իրենք ստուգելու»,-ասաց Մարուքյանը։

Նա հարց ուղղեց, թե ինչպես պետք է ստուգվի անձի հանցավոր ենթամշակույթի հետ կապը․ <<Ես եմ ու կոռուպցիայի կանխարգելման հանձնաժողովում եմ աշխատում, ո՞նց ստուգեմ դատավորի թեկնածուի կապը հանցավոր ենթամշակույթի հետ։ Պետք է ինչ-որ մեկը դատված լինի այդ հանցավոր ենթաշակույթի հոդվածով, դատավորի թեկնածուն այդ մարդու հետ ինչ-որ կապ ունեցած լինի։ Այդ ո՞նց է կոռուպցիայի կանխարգելման հանձնաժողովը դա իմանալու»։

Մանրամասները՝ տեսանյութում

Աղբյուր` Փաստինֆո