Փաստ ինֆո

Տավուշի մարզպետարանն այս օրերին առավել մեծ ուշադրություն է դարձնում տնտեսական հնարավորությունների օգտագործմանը և տնտեսական զարգացման ծրագրերի խթանմանը:

«Փաստինֆո»-ի հետ զրույցում Տավուշի մարզպետ Հայկ Չոբանյանն ասաց, որ մարզպետարանում ստեղծվել է Հնարավորությունների հանձնաժողով, որի ղեկավարը հենց մարզպետն է: Հանձնաժողովի առջև դրված խնդիրն է ներկա կացութաձևից ելնելով ստեղծել նոր հնարավորություններ տնտեսական, մշակութային զարգացումը ոչ միայն ապահովելու, այլև զարգացման նոր հնարավորություններ ստեղծելու նպատակով. «Կորոնավիրուսով պայմանավորված այս փոփոխությունը մեր կյանքում նոր հնարավորություններ է ստեղծում, որոնք ոչ միայն կարճաժամկետ, այլև երկարաժամկետ ասպեկտում պետք է դիտարկենք: Առաջվա նման մեծ կարևորություն ենք տալիս գյուղատնտեսությանը որպես պարենային անվտանգության բաղադրիչ: Միաժամանակ ուշադրություն ենք դարձնելու այն ուղղություններին, որոնք մինչ այսօր գուցե այնքան էլ առաջնային չէին համարվում»,-նշեց Հայկ Չոբանյանը:

Վերջինս ընդգծեց ստիպված են հաշվի նստել հատկապես զբոսաշրջության և սպասարկման ոլորտում առկա տնտեսական ճգնաժամի հետ և համապատասխան աջակցության գործիքներ կիրառեն թե' տնտեսվարողների, թե' աշխատակիցների համար. «Դրանցից մեկն էլ վերապրոֆիլավորումն է: Պետք է մեր համապատասխան գործիքակազմն օգտագործենք, այդ թվում առցանց մարդկանց վերապատրաստելու այն մասնագիտությունների ուղղությամբ, որոնք նոր կացութաձևում ավելի մեծ պահանջարկ ունեն աշխատաշուկայում: Մտածում ենք նաև փոքր դրամաշնորհային ծրագրերի մասին»,-նշեց Հայկ Չոբանյանը:

Տավուշի մարզում ռիսկային խմբում են զբոսաշրջային և սպասարկման ոլորտի կազմակերպությունները, որտեղ մեծաքանակ մարդիկ են ներգրավված. «Մեզ մոտ այդ խնդիրը շատ ավելի կրիտիկական է Դիլիջան քաղաքում: Այն զբոսաշրջային քաղաք է, և հարյուրավոր մարդիկ են ներգրավված այդ ոլորտում:

Պետությունն այս պահին որոշակի ծրագրեր է իրականացնում: Կարծում եմ առաջիկայում այս առումով կհայտարարվեն լրացուցիչ ծրագրեր»,-ասաց մարզպետը նկատելով, որ բնականաբար ստեղծված իրավիճակից տուժողներ կլինեն, սակայն իրենց խնդիրն էլ հենց բոլոր նմանատիպ դեպքերին արձագանքելն է:

Այս պահին մարզում գործում են հիմնականում փոքր առևտրային կազմակերպությունները, սննդի արդյունաբերության մեջ ներգրավված կազմակերպությունները, ինչպես նաև մարդիկ զբաղվում են գյուղատնտեսությամբ: Մարզպետի վստահեցմամբ գյուղատնտեսությունը թույլ է տալիս միաժամանակ և' պահպանել գոյություն ունեցող սահմանափակումները, և զբաղվել արտադրությամբ:

Այս պահի դրությամբ Տավուշի մարզում վարակակիր չի արձանագրվել: Հայկ Չոբանյանը վստահեցնում է` կասկածելի բոլոր դեպքերի նկատմամբ սահմանված կարգով հսկողություն են իրականացնում: Մարզի բնակիչները ևս ավելի պատասխանատվությամբ են մոտենում իրավիճակին և հայտարարված արտակարգ դրությանը համապատասխան վարքագիծ դրսևորում. «Կարգուկանոնի պահպանման տեսանկյունից ամեն օր լավ վիճակում ենք»,-հավելեց Հայկ Չոբանյանը:

Հեղինակ՝ Հասմիկ Կոշկարյան

Աղբյուր` Փաստինֆո